OROQUIETA CITY, Misamis Occidental, Mayo 18 (PIA)--Gikatakda nga iduso sa kagamhanang probinsyal sa Misamis Occidental ang usa ka hangyo nga tugutan sa Inter-Agency Task Force for COVID19 (IATF) ang pagpahigayon sa religious activities dinhi sa lalawigan.
Kini human gipaburan sa mga mayors ang plano ni Governor Philip Tan atol sa gihimo nga consultative meeting sa mga mayors kaganinang buntag.
Gibutyag pa ni Governor Tan nga kun kini tugutan sa IATF kinahanglan lamang nga sundon sa mga matoohon ang mga health protocols nga una na nga giplastar sa gobyerno sama sa pagsuot sa facemask, social distancing, ug di una tugutan ang mga senior citizen ug mga nagpangidaron ug 21 paubos.
Iyang gidugang nga ang maong lakang usa ka pamaagi sa hinay hinay nga pagdawat sa katawhan sa mga systema ipatuman sa new normal.
Unang gipanawagan sa relehiyosong gobernador kaniadtong nagsugod pa lamang ang GCQ nga bisan pa man sa wala pagtugot sa IATF sa mga relehiyosong kalihukan sa gihapon i padayon ang hugot nga pagtoo pinaagi sa pag-ampo sa labaw nga makagagahom bisan diha lang sa panimalay.
Mahinumduman nga subay sa IATF resolution ang lalawigan ang sa gihapon anaa sa General Community Quarantine sugod Mayo 16 human gibakwi ang pagpa ilalom niini sa mga lugar nga anaa sa low risk area ug usa sa mga gikansela nga kalihukan sa mga lugar anaa sa GCQ ang mga religious gathering. (BETHSER DABLO/MisOcc)
Source: Philippines Information Agency (pia.gov.ph)
0 Comments