MARAWI CITY, Hunyo 29 (PIA) — Libo-libo kon linibo ka mga Personal Protective Equipment (PPE) ug pipila ka mga ‘tents’ ang gi-turn over sa United Nations High Commissioner for Refugees (UNHCR) sa Bangsamoro Government kani-adtong Biyernes, Hunyo 26, sa opisina sa BARMM-READi sa Cotabato City.
Mitambong sa seremonya si BARMM Chief Minister Ahod 'Al Haj Murad' Ebrahim ug gipirmahan ang mga dokumento nga ilang nadawat gikan kang Sapia Taulani, Senior Protection Associate sa UNHCR.
"Kung kami lang, dili namo makaya ug sulbad ang atong gi-atubang karon nga mga hagit sa COVID-19 pandemic. Kinahanglan namo ang suporta sa mga komunidad nga nagdonar, nasyonal nga gobyerno, ug uban pang mga ahensya sa United Nation. Paspas kayo ang suporta nga gihatag kanato gikan sa atong international donors ug dali kaayo ang pagtubag nila sa among mga kinahanglanon. Ang ilang tukma nga aksyon nakatabang og dako sa among mga inisyatibo sa pakigbatok sa virus sa rehiyon,” miingon si Ebrahim.
"Wala pa kita makasulbad sa mga pagsulay niining pandemya ug wala kita kahibalo kung kanus-a pa matapos ang katalagman. Wala’y bisag isa nga makatagna apan kinahanglan nga mangandam kami sa umaabot,” ingon niya.
Lakip sa mga gidonar nga mga gamit mao ang 100 ka mga plastik nga mga tarpaulin (nga adunay mga eyelets, fire retardant 4X5m); 1,110 ka piraso sa N95 nga face mask; 1,110 nga pares sa ‘patient care gloves’; 3,000 nga mga piraso sa ‘surgical caps’; 3,000 nga pares sa ‘shoe cover’; 500 ka kahon sa ‘medical mask’; ug 4,740 ka piraso sa mga ‘face shields’.
"Gikinahanglan kaayo namo kini nga mga donasyon nga gihatag sa amo gikan sa UNHCR, labi na kung magpadayon kami sa pagdawat sa mga nag-avail sa mga programa nga gitakda sa gobyerno," ingon ni Ebrahim, ug midugang usab siya pagpahibalo nga kadaghanan sa mga medical suplay gamiton alang sa pag-atiman sa mga Returning Overseas Filipino Workers (ROFs) ug Locally Stranded Individuals (LSIs) sa rehiyon.
Gipasalig ni Taulani nga magpadayon ang ilang panagtambayayong ug ang paghatag sa mga PPE mao ang pagsugod sa ilang ‘renewed commitment’ sa rehiyon.
"Ang UNHCR usa sa mga unang nagdonar sa amo, nga naghatag sa mga ‘tents’ ug mga kinahanglanon nga kagamitan sa pag-atiman sa mga repatriated Filipino ug gibutang sila sa among mga ‘isolation facilities’ sa Sibakel Island," matud ni Minister of Interior and Local Government Atty. Naguib Sinarimbo, nga nagtambong usab sa seremonya.
"Kini nga seremonya sa turn-over usa ka pagpakita sa padayon nga panagtambayayong tali sa BARMM ug UNHCR isip among donor community," dugang niya. (BGE/PIA ICIC)
Source: Philippines Information Agency (pia.gov.ph)
0 Comments