Cebuano News: Duha ka ‘holidays’ sa Bohol sa Hulyo

CORTES, Bohol, June 29 (PIA) -- Duha ka Special Non-Working Public Holidays ang gipaabut sa mga Bol-anon alang sa nagsingabot nga buwan sa Hulyo.

Pagsugod pa lamang sa buwan sa Hulyo, Hulyo 1, gideklara sa Republic Act 8267 ang tanan adlaw sa Hulyo 1 nga Non-Working Special Public Holiday sa Tagbilaran City, sanglit kini mao man ang adlaw nga ang Tagbilaran gideklara nga mamahimong Chartered City.

Ang Tagbilaran City, nahimo nga Chartered City niadtong Hulyo 1, 1966, mao nga karong tuiga, saulogon sa Tagbilaran ang ilang ika 54 nga pagka chartered city.

Ang pagkahimo nga Chartered City sa Tagbilaran, dala sa Republic Act No. 4660, ug sukad niadtong balaoda, ang Tagbilaran giisip nga nga component city sa lalawigan sa Bohol.

Sa Pilipinas, ang mga syudad nga may kaugalingong charter, minglahutay isip corporate ug administrative entities gigiyahan sa ilang kaugalingon nga gipanday nga balaod dugang pa sa gilagda sa Local Government Code of 1991.

Ang Local Government Code mao ang nagpahiluna sa ilang estraktura isip administratibo nga entity, ug  ang gahum nga mahimo nilang gamiton.

Sa lain nga bahin, sa pagka Hulyo 22, lain na usab nga nga holiday ang mapaabut.

Pinaagi sa Republic Act 7683, gideklara nga usa  ka Non Working Special Public Holiday sa lalawigan sa Bohol ug sa syudad sa Tagbilaran, dala sa pagsaulog sa Bohol Day.

Niadtong Hulyo 22, 1854, ang Bohol opisyal na nga gi-lain kauban sa Siquijor, nga may kaugalingnan na gikan sa inahang lalawigan sa Sugbo.

Ang nahisgutan nga adlaw usab gimugna ang Bohol isip usa na ka lahi nga politico-military province sa panahon sa paghari sa mga Espanyol dinhi sa Pilipinas, deklarasyon nga giila usab sa pagsulod sa rehimen sa mga Amerikano dinhi.   

Karong tuiga mao nay ika 166 ka tuig nga kasumaran sa Bohol Day. 

Hinuon kon ang nga nanglabay nga mga kasaulogon gihimong sinugdanan sa pagsadya sa usa  ka buwan nga Sandugo Festival, mamahimong lahi ang gitagana alang sa lalawigan kang kinsa nga mga katawhan nagawngan pa gihapon sa mga palisiya pagpugong sa pagkatag sa corona virus disease (COVID-19). (rahc/PIA Bohol) 

Source: Philippines Information Agency (pia.gov.ph)