TAGBILARAN CITY, June 1 (PIA) -- Gisugdan na sa Department of Education (DepEd) karong adlawa, Hunyo 1, ang pagpahigayon og remote enrollment alang sa usa ka buwan'g enrollment period sa mga pampublikong tunghaan alang sa School Year 2020-2021.
Ubos sa remote enrollment, dili na kinahanglang moadto pa ang mga estudyante o ginikanan sa mga eskwelahan aron mo-enroll isip paglikay sa hulga sa coronavirus disease 2019 (COVID-19).
“Whole month of June under sa atong calendar that is the enrollment period. Pero atong gi-klaro nga walay bata nga moadto sa eskwelehan aron magpa-enroll,” matud pa ni Bohol Provincial Schools Division Superintendent Bianito Dagatan.
Samtang gipahayag ni DepEd Undersecretary Diosdado San Antonio karong buntag nga ang enrollment gikan sa Hunyo 1 taman 15 ipahigayon pinaagi sa internet, text o tawag sa mga adviser sa niaging tuig sa mga estudyante.
Giingong mahimo usab nga ang mga ginikanan ang motawag sa mga adviser sa ilang anak pinaagi sa mga numerong ilang igahin alang sa enrollment.
May mga enrollment focal person (EFP) usab nga modawat og tawag ug motubag sa mga pangutana kalabot sa kindergarten, transferees, Balik-Aral ug ALS learners.
Matud pa nga tugotan lamang ang physical enrolment human sa unang duha ka semana sa enrollment period apan kinahanglang seguradohon nga masunod ang mga health ug safety protocol.
Sa ipahigayong usa ka buwan nga enrollment, may tubagon nga survey ang mga ginikanan kalabot sa pillion nila nga mode of learning alang sa ilang mga anak karong school year kun modules o internet ba.
Samtang karong adlawa usab gilusad sa DepEd ang 2020 Brigada Eskwela ug Oplan Balik Eskwela. (ecb/PIA7-Bohol)
Source: Philippines Information Agency (pia.gov.ph)
0 Comments