KALIBO, Aklan, Agosto 27 (PIA) -- Nagpagwa kurundaya eamang si Gobernador Florencio T. Miraflores it probinsya it Aklan it Executive Order No. 035 sa pagpangaman ag pagbantay sa tanan nga mga aeagyan ag dueunan pasueod sa probinsya nga sa idaeum makaron it Modified Generall Community Quarantine (MGCQ).
Rayang Executive Order nga pinaka ulihi sa serye it mga EO nga ginpaguwa it gobernador agud ma protektahan ro mga Aklanon kontra sa pandemya nga COVID-19, hay nagatao it importansya sa pagmanehar ag pagbantay sa mga dueunan ag aeagyan bangud sa padayon nga pagtinaas it numero it mga nag positibo sa COOVID-19 sa mga kaeapit nga mga probinsya ag mga siyudad sa rehiyon.
May mga lokal man nga “transmission” kon siin nagadinugang ra kada adlaw ag owa man it makit-an nga ginatawag nga “flattening of the curve,” suno sa Gobernador sa ana ngara nga E.O.
Raya nga Executive Order hay may mga pahanumdum sa mga tawo nga maga adto sa Aklan nga halin man sa Western Visayas, ag sa mga magahalin sa iba nga mga rehiyon.
Tanan nga mga tawo nga naghalin sa Western Visayas hay makasueod sa Aklan, suno sa E.O., basta sundon nanda ro Border Management Protocol paagi sa pag fill up sa Online Health Declaration Card QR Code.
Sa mga gasueod sa Aklan nga halin sa iba nga rehiyon, maagi man sanda gihapon sa border management basta magpresentar sanda it mga kinahangeanon nga mga dokumento, depende sa andang klasipikasyon.
Kon Returning Overseas Filipinos (ROFs), dapat nga magsumiter sanda it Negative RT-PCR nga resulta nga gin issue it accredited testing laboratory it Department of Health, may Quarantine Certification nga gintao it DOH ukon Bureau of Quarantine, samtang kon Locally Stranded Individuals ukon LSIs, dapat may anda nga travel authority nga gin isyu it Joint Task Force COVID Shield, may Negative RT-PCR nga resulta nga gin isyu it sangka accredited nga testing laboratory it DOH, ag Certificate of Coordination halin sa magabaton nga LGU ukon munisipyo.
Sa pihak nga parte, ro mga Authorized Persons Outside Residence (APOR) hay dapat magpresentar man it Negative RT-PCR nga resulta nga gin isyu it accredited nga testing laboratory it DOH, may ID nga gin isyu it gobyerno ukon balido nga ID it kompanya ukon Certificate of Employment, travel order para sa mga opisyales it gobyerno, ukon “proof of engagement” ku andang serbisyo.
Ro euwas sa pag sumiter it mga nasambit nga mga dokumento hay ro mga APOR nga halin sa Philippine National Police, Bureau of Fire Protection,Bureau of Jail Management and Penology, Philippine Drug Enforcement Agency, National Bureau of Investigation, Philippine coast Guard, Armed Forces of the Philippines ag iba basta may anda nga mission order, travel order, ukon anuman nga pamatuod ku andang panaw sa probinsya bangud sa andang trabaho.
Daea pa gid kara ro mga katapu it Judiciary kon siin ro andang trabaho hay magbista ag mag-obra ku andang trabaho sa daywa ukon sobra pang probinsya sa sueod it sang dominggo, mga pinuno it departamento sa rehiyon ag andang mga representante nga nagatan-aw sa operasyon ku mga upisina sa probinsya.
Euwas man sa pagsumiter it mga dokumento ro mga senador ag kongresista ag andang mga Chief of Staff, mga sekretaryo, undersecretaries ag assistant secretaries, Ombudsman ag Deputy Ombudsman, ag Bureau Directors.
Tanan nga turista halin sa Western Visayas nga magaadto sa isla it Boracay hay magaagi man sa border management procedure ag maga presentar it konpirmado nga booking sa mga establisimyento nga gin accredit it Department of Tourism antes sanda sugtan nga magsueod sa Aklan ag sa isla it Boracay.
Sa mga health personnel, ro mga nagatrabaho sa gobyerno probinsyal nga magaadto sa guwa it Aklan may kaangtanan sa andang trabaho hay magaagi man sa border management procedure, samtang ro mga bukon it Aklanon hay dapat nga mag usoy lang it tiniran sa Aklan mientras epektibo ro EO.
Sa mga nagatrabaho sa pribado nga pasilidad, ro health personnel ag driver nanda nga magabyahe paguwa sa probinsya hay magaagi man sa border management procedure.
Ro mga espesyalista nga magaadto sa Aklan nga maga opera ag maga obra it iba pang ueubrahon pareho ku chemotheraphy hay magaagi sa border management ag dapat may letter of coordination halin sa probinsya it Aklan.
Sa pinakaulihing lista, ro Aklan hay may 26 nga COVID-19 nga positibo nga kaso kon siin 13 eon ro nagmayad, sambilog ro naka admit, 11 ro sa pasilidad ag sambilog ro patay.
Ro EO 035 hay epektibo sa probinsya halin it Agusto 19 hasta Agusto 31, 2020. (JSC/VGV/PIA6 Aklan)
Source: Philippines Information Agency (pia.gov.ph)
0 Comments