Cebuano News: Dugang 8 nga kaso sa COVID-19 natala sa Ozamiz

OZAMIZ CITY, Misamis Occidental, Agosto 8 (PIA)—Aduna’y nadugang nga walo ka mga indibidwal nga nagpositibo sa COVID-19 sa syudad.

Lima niini gi-isolate sa SM LAO Hospital pag-abot nila mismo sa Dakbayan sa Ozamiz. Ang tulo usab ka mga indibidwal nga nagpositibo ang kasamtangan nga anaa karon sa ilang isig ka barangay quarantine center ug gi-andam nga kuhaon aron dalhon sa atong Isolation facility sa SM LAO Hospital. 

Ang usa ka COVID-19 nga pasyente, anaa na gi-isolate sa barangay quarantine center sa Capucao P, usa ka LSI nga gikan sa Manila. Nakita nga positibo ang iyang reverse transcription polymerase chain reaction (RT-PCR) test sa adlaw sa iyang pagkumpleto sa 14-day mandatory quarantine tungod kay ang syudad naa’y mandatory repeat rapid test. Aduna usab siya'y usa ka kauban sa quarantine facility nga niuna ug gawas kaniya nga karon gipailalom sa swab test aron makapanigurado ang dakbayan niini.

Duha usab ang nagpositibo sa COVID-19 nga taga-Barangay Bacolod, Ozamiz City. Ang usa ka pasyente (Bacolod Case #3), anaa ra sa ilahang barangay isolation/quarantine center ug karon gibalhin sa SM LAO hospital aron didto i-isolate.

Ang usa ka pasyente nga taga Bacolod (Bacolod Case #2), nakagawas na kini, apan gikuha ug balik para ma-swab test kay nakita nga ang iyang kauban sa quarantine facility center nagpositibo usab sa virus.

Agosto 6, gi-swab test ang pamilya ni BC #2  lakip na ang duha ka anak, duha ka mga igsuon, ug iyang mama ug papa. 

Nag-contact tracing na usab ang mga medical personnel sa dakbayan ug gipailalom sa temporary lockdown ang parte sa Purok Bonifacio, Barangay Bacolod sulod sa 100-meter radius sa balay ni BC #2.

Si Ozamiz City Mayor Sancho Fernando Oaminal miingon, “Ang COVID-19 naghinay-hinay na ug kuyanap sa atong dakbayan. Mao na kini so far ang worst situation sa atong dakbayan. Palihug tabangi kami nga inyong mga lideres sa pagsugpo sa maong virus.”

Musuma total sa 20 na ang kumpirmadong kaso sa COVID-19 sa dakbayan, 18 ang active cases ug 2 ang nakarekober na. (Ozamiz Info Office/ SMRN)

Source: Philippines Information Agency (pia.gov.ph)