TAGBILARAN CITY, Aug. 17 (PIA) -- Nipasidaan na ang Department of Trade and Industry (DTI) kalabot sa pagbaligya og overpriced face shields.
Kini matud pa ni DTI Kalihim Ramon Lopez, human base sa ilang pag-monitor sa pagbaligya og face shields nga obligado nang isuot kun naa sa mga pampublikong sakyanan ug bisan sa mga lugar trabahuan.
Matud pa ni Lopez nga pipila ka tindahan ang nagbaligya og lapas sa gitakdang suggested retail price (SRP) nga P25 hangtod P50 kada usa.
Giseguro sa kalihim nga padayon ang pagpahigayon og inspeksyon sa ilang buhatan sa mga tindahan aron matino kun gisunod ang SRP sa mga namaligya og face shields.
May multang P5,000 hangtod P2-M ang ipahamtang sa mga establishment nga mosupak sa SRP sa face shield.
Samtang pagkabilanggo og lima hangtod 15 ka tuig ang silot alang sa mga magpahimos sa pagbaligya og face shield.
Gilagdaan ning bag-o lang ni Department of Health (DOH) Kalihim Francisco Duque III ang Department Order No. 0345 nga nagtakda sa SRP sa mga non-medical grade nga face shields. Gihulagway usab sa ahensiya kun unsa ang makonsiderar nga non-medical grade face shield.
Una na niini nga angay may nakabutang nga acetate o transparent nga plastic alang sa fog resistance ug magamit og klaro.
Kinahanglan usab may adjustable nga band usab kini aron tarong nga mabutang sa ulo sa mogamit. Motabon kini sa tibuok nawong sa mogamit. Hinimo kini sa lig-on nga materyal nga maoy mahimong i-disinfect, gamiton og balik o i-dispose. (ecb/PIA7-Bohol)
Source: Philippines Information Agency (pia.gov.ph)
0 Comments