Cebuano News: Internet cafès buksan apan walay duwa, lingawlingaw

CORTES, Bohol, Aug. 4 (PIA) –- Gitugotan man ang pagbukas sa mga internet cafes ug shops, apan gidili pa gihapon ang pagsulod didto alang sa pagduwa sa online games ug paglingaw lingaw.

Kini maoy gitataw didto sa Executive Order No. 39 nga nagpa-uswag pa sa kaepektibo sa Executive Order No. 33 nga nag pahimutang sa kinatibuk-an nga isla sa Bohol ubos sa Modified General Community Quarantine, ug kini taman na sa Agosto 31. 

Gawas lamang kon ang pagsulod sa internetan alang sa educational nga katuyuan o dili ba hinuon, tungod sa trabaho, katugotan ang mga tawo nga mosulod, apan, bahad sa Executive Order nga gilagdaan ni Gob. Arthur Yap niadtong Hulyo 30, kinahangalng dili magpasulod sa sobra sa katunga nga kapasidad sa internetan.

Kini nga kalambuan, haum usab sa lapad nga panginahanglan sa daghang internet access samtang may mga tunghaan na sa nasud nga ngangandam alang sa gitawag sa Department of Education nga online Distance Learning ug Blended Learning nga maggamit sa wed. 

SA HIGAYON NGA WALA PAY KLASE NGA MAG-ATUBANG ANG KABATAAN SA TUNGHAAN. Ang mga pamaagi sa pagkat-on karon nahasubay pa sa walay face-to-face classes subay sa pagdili sa mga pagtapoktapok, pagsubay sa social distancing ug pagpakunhod sa sulod sa mga lugar tapokanan, ang pagpabukas sa mga internet cafes dako og ikatabang sa mga kabataan. Gani, dala niini nga mga mandu, ang mga bansaybansay sa kagamhanan gilatid lamang alang sa labing daghan, 15 ka tawo matag batch, sama sa nia sa hulagway. (rahc/PIA-7/Bohol)

Gani, sa dili pa opisyal nga magbukas, kinahanglan pa nga magkuha ang tag-iya sa pagtugot sa local nga kagamhanan aron masubay kon nasunod ba  ang mga lagda sa luwas ug mabinantayon nga negosyo taliwala sa nagpadayon nga hulga sa COVID-19.

Sa gipabuksan nga mga internet shops ug cafes, gitahasan sa EO ang mga sakop sa Philippine National Police, ang city ug municipal business permits and licensing offices ug  ang   mga barangay officials sa hugot nga pagsubay-subay kon ang nahisgutan nga internet shop, nagseryoso ba  sa pagpatuman sa mga probisyones sa EO ug sa health and safety protocols.  

Gawas pa, tungod sa nagkadaghan nga kaso sa COVID-19 nga pulos na gani pagpanakodtakod na dinhi ug dili dala sa mga LSI ug OFW, giuswag gayud sa gobernador ang tagal sa Modified General Community Quarantine (MGCQ) dinhi sa Bohol nga motapos na unta niadtong Hulyo 31.

Karon, hangtud na sa Agosto 31, segun pa sa Executive Order.

Padayon pa usab nga giuswag ang pagdili sa pagpangabri sa Karaoke TV Bars, Nightclubs, Cinemas, Karaoke joints u gang pagpahigayon sa mga buwang, pustaanay ug pagsugal.

Sa taho nga may pagpanakodtakod usab dinhi nga nadala sa mga mamaligyaay nga manabo sa kalungsuran, gitahasan na sa nasampit nga EO ang kalungsuran sa paghukom sa paghimo og tabo, sanglit matud pa, anaa kini sa ilang mga gahum nga gihuptan subay sa Local Government Code. 

Hinuon, hugot nga gipahinumdom sa gobernador nga kinahanglan nga sundon gihapon ang social distancing, paggamit sa face masks, quarantine passes ug  ang local nga mga bansay aron ikalikay ang mga manabo-ay sa pagtakud sa sakit. (rahc/PIA-7/Bohol)

Source: Philippines Information Agency (pia.gov.ph)