TAGBILARAN CITY, August 5 (PIA) -- Gibuksan na sa Gov. Celestino Gallares Memorial Hospital (GCGMH) ang labing una'ng polymerase chain reaction (PCR) laboratory sa lalawigan sa Bohol nga nahimutang sulod sa tambalanan niadtong Lunes, Agosto 4, 2020.
Si Gob. Arthur Yap nga nitambong sa maong pagbukas miingon nga usa kini ka “milestone” sa pagkigbugno sa lalawigan batok sa coronavirus disease 2019 (COVID-19).
Sa pagbukas sa maong laboratoryo, dinhi na ipaghigayon ang RT-PCR test ug dili na kinahanglang ipadala pa sa syudad sa Sugbo ang mga swab sample nga kaniadto molanat pa ngadto sa duha ka semana sa dili pa makapagawas ang Sugbo sa resulta.
Ang laboratoryo nga nahimutang sulod sa GCGMH, ang bugtong COVID-19 referral hospital sa lalawigan, maoy labing unang pasilidad nga may katakos nga mopahigayon og PCR testing ug gipaabot nga paspas nga makapagawas sa resulta sa mga samples nga nakuha.
Si GCGMH medical center chief Dr. Mutya Kismet Macuno nagkanayon nga gipahigayon ang ‘soft opening’ sa PCR lab niadtong Lunes sa hangyo ni Gob. Yap pasiuna sa ipahigayong “grand opening” karong Biyernes, Agosto 7.
“Nihangyo g’yud si governor nga ato nang sugdan dayon labina kay duna na pud tay duha ka bag-ong local transmissions,” pagbutyag pa ni Macuno.
Matud pa sa GCGMH medical center chief nga ang maong laboratoryo, nakapasar sa proficiency test nga gipahigayon sa Research Institute for Tropical Medicine (RITM) base sa mga resulta nga gipadangat niadtong Domingo, Agosto 2.
Ang Department of Health (DOH), human sa mga kalamboan nihatag usab og pagtugot ngadto sa GCGMH sa pagsugod na sa ilang operasyon sa bag-ong PCR lab.
“We got an email from the RITM nga perfect ang atong score, 100 percent,” pagbutyag pa ni Macuno.
Gi-ila usab ni Macuno ang paningkamot sa iyang team nga naglakip sa mga health workers nga gipadala pa sa syudad sa Sugbo aron ipaubos sa pagbansay unsaon pag-operate sa maong molecular lab.
Kahinumdoman nga duha sa maong medical frontliners ang natakdan sa COVID-19 samtang nipaubos sa pagbansay niadtong buwan sa Mayo apan parehong nangaayo na ug nakaule na dinhi sa Bohol.
“Dagko g’yud kaayo tawn og sakripisyo kay tiaw ba gud nga kadtong atong gipadala og training, nagstay sila didto og quarantine og two weeks, diri pud, so nibunga na ang atong mga pagpaningkamot,” matud pa ni Macuno.
Sa pagkakaron, ang lalawigan sa Bohol adunay 90 ka kumpirmadong kaso sa COVID-19 diin 23 niini ang aktibo, 63 ang nangaayo na ug 4 ang patay. (ecb/PIA7-Bohol)
Source: Philippines Information Agency (pia.gov.ph)
0 Comments