MALAYBALAY CITY, Agosto 20 (PIA)—Aprobado na sa 26th Sangguniang Panlalawigan ang Provincial Ordinance No. 2020-028R nga nag-ingon“An Ordinance Providing for the New Normal Code in Response to the COVID-19 Pandemic in the Province of Bukidnon and for other Purposes” o giila kini nga “New Normal Code sa probinsya sa Bukidnon.
Sa Article II, Section 5 sa maong ordinansa, nabutang ang mga sumbanan sa minimum public health standards nga matawag nga new normal sa Bukidnon diin kini gikinahanglan himuon ug i-imposar sa tanang establisyemento, trabaho-an, tindahan, opisina pribado man o publiko aron mapataas ang pisikal ug mental nga kalig-on, makunhuran ang pagtakod, ug mapakusgan ang pag “contact tracing.”
Mao kini ang musunod: 1. Wearing of Facemask or Face Covering - Gimanduan ang tanang tawo nga kung mugawas sa tagsa-tagsa ka panimalay o muadto sa publikong mga lugar kinahanglan nga magsuouot sa facemask o tabon sa nawong. Ang dili magsuot og facemask dili tugotang makasulod sa tanang establisyamento ug pampublikong lugar. Apan, niadtong mga tawo nga nagabuhat sa pisikal nga ehersisyo diha sa kadalanan o parke, adunay pagdistansya sulod sa 10-metros o sobra pa, ug ang pagtaod sa facemask mahimo kining kapilian.
Physical Distancing - ang pagsiguro sa pisikal nga distansya labing minus sa usa ka metro diha sa paghimo sa mga transaksyon ug limitahan ang kadaghanon sa mga kliyente o customer sulod sa mga establisyemento, opisina ug uban pa.
Basic Hygiene Etiquettes - gimanduan ang mga establisyamento sa pagbutang sa mga kahimanan sa kahinlo sama sa kasilyas, hugasanan sa kamot, tubig, sabon, 70% alcohol o sanitizer, footbath ug uban pa.
Identifying and Isolating Symptomatic Individuals - tanang establisyamento gimanduan usab sa pag-ila sa mga symptomatic pinaagi sa pagbutang sa temperature scanner diha sa entrance, pagtaho sa kon kinsa kadtong adunay hilanat (38 degrees Celsius), ubo, paglisud sa pagginhawa ug uban pang mga simtomas sa COVID-19 dad-on ngadto sa Municipal o City Health Office o sa mga otorisadong personahe sa maayong panglawas sa gobyerno.
Apil sa bag-ong ordinansa ang padayung pagdili sa paglamanuhay, beso-beso ug ang pag-ginaksanay agi ug pagtimbaya sa usag-usa.
Ang curfew sa mga batan-on mamahimong ipadayun sa matag lokal nga kagamhanan ug ang mga border checkpoints magapadayun pinaagi sa pagpanguna sa mga kapulisan.
Ang maong mga ordinansa mamahimong epektibo human ma-imantala sa kagamhanang probinsyal ug ma-imposar diha-diha dayon sa panahon nga wagtangon na ang IATF Quaratine sa Bukidnon diin mamahimong ‘functus officio’ o walay legal na nga epekto ang State of Public Health Emergency kung kini bakwi-on na sa Presidente sa nasud o i-deklara sa World Health Organization (WHO) nga gibakwi na ang State of Emergency gumikan sa COVID-19 Pandemic o kung asa ang mahi-una niini. (PGO-PAIA/PIA-Bukidnon)
Source: Philippines Information Agency (pia.gov.ph)
0 Comments