Cebuano News: LGU-Tagbilaran, nakadawat og 'Kagalingan sa Kalusugan' Award

TAGBILARAN CITY, Sept. 24 (PIA) -- Ang lokal nga kagamhanan sa syudad sa  Tagbilaran nakadawat na usab og laing pasidungog alang sa sulondon niining mga inisyatiba.

KAUBAN SA MGA HUGPONG. Sa pagpadayon sa maayong bansay sa maayong panglawas, nakigtali ang Syudad sa tagbilaran sa mga kahugpungan kinsa nanghatag usab og nasal spray aron mapugngan ang pagkatag sa kagaw subay sa ginhawaan sa tawo, kini atul sa hulga sa COVID. (PIA Bohol file photo) 

Ang Philippine College of Lifestyle Medicine (PCLM) ning bag-o lang mipasidungog sa City Government of Tagbilaran sa “Kagalingan sa Kalusugan” (KSK) Award sa Local Government Unit Advocate of Health nga kategorya.

Usa  lamang kini sa tulo ka major awards nga gihatag sa PCLM sa tibuok nasod karong tuig 2020.

Ang 3 ka major awards nga gihatag mao ang Lifestyle Medicine Physician of the Year, Local Government Unit Advocate of Health, ug Lifestyle Medicine Advocate of the Year.

Alang sa Local Government Unit Advocate of Health nga kategorya, ang PCLM miila ni Mayor John Geesnell Yap II ug sa lokal nga kagamhanan sa syudad sa  Tagbilaran alang sa sulondong inisyatiba sa pagpalambo sa maayong panglawas ug kahilwasan sa publiko.

Ang PCLM miila sa batan-on ug ‘tech-savvy’ nga Chief Executive sa Tagbilaran City kansang presensya online, nakapadani og atensyon gamit ang social media platforms sa paghatod sa tukma sa panahon nga kasayoran ngadto sa mga residente sa syudad.

Ang batan-ong mayor nga usa  usab ka atletik nga pagkatawo, nagsuporta, nagpalambo ug nagdasig sa katawhan padulong sa sports ug pisikal nga aktibidad, usa  sa mga haligi sa Lifestyle Medicine.

Taliwala sa krisis sa panglawas, gawas sa pagpanghatag sa LGU-Tagbilaran og mga suplay sa pagkaon matag pamilya, ang inisyatiba ni Yap sa pag-deploy og mga food trucks sa pagseguro sa mga nanginahanglang pamilya nga may makaon nga mga masustansyang pagkaon, giila usab.

Dakung pontos usab alang sa PCLM ang pagmugna sa syudad sa Tagbilaran sa KALINAW, usa  ka inisyatiba nga nagpatugbaw sa kamahinungdanon sa paghatag og emosyonal ug mental health nga suporta ngadto sa mga ginsakupan, usa  ka panginahanglan nga giila ug gi-aksyonan dayon.  Pinaagi niini, nakahatag usab ang syudad sa Tagbilaran og stress debriefing sessions sa ilang mga frontliners.

Ang PCLM miila kang Yap ug sa local government unit sa Tagbilaran, nga may mga programang nagdala og ‘holistic concept of well-being’, diin kinahanglan natong atimanon ang pisikal ug lakip na usab ang mental health.

Kining tanang, ang PCLM nikomitar paingon sa pag-advocate alang sa pagpalambo sa ‘advancement and excellence of clinical practice and public policy issues relating to lifestyle medicine.’

Si Yap, sa iyang Facebook post, mipadayag sa iyang pasalamat ngadto sa PCLM sa pag-ila sa ilang kakugi sa pagpromot sa health ug public safety alang sa mga Tagbilaranon.

Sa ngalan sa syudad sa Tagbilaran, gidawat ni Yap ang award pinaagi sa virtual awarding ceremony niadtong Setyembre 23, 2020. (ecb/PIA7-Bohol)

Source: Philippines Information Agency (pia.gov.ph)