Ang lalawigan sa Bohol sa pagpanguna ni Gob. Arthur Yap ug mga lokal nga magbabalaod, nipasiugda og lakang sa pagbukas og balik sa lalawigan ngadto sa tagagawas pinaagi sa pag-host sa Philippine Travel Exchange (PhilTEX) sa Bohol. Ang maong kalihokan magdala og mga turista nga ipaubos sa 5 ka adlaw nga kuwaratena sa dili pa e-test alang sa COVID-19 virus sa dili pa sila tugotan sa pagbiyahe nga luwas gikan sa impeksyon o kontamisasyon. (Hulagway: Art Yap Bohol)
TAGBILARAN CITY, Sept. 18 (PIA) -- Ipakita sa lalawigan sa Bohol ang bag-ong normal kun ‘new normal’ sa mga tigbiyahean sa ipahigayon'g Philippine Travel Exchange (PhiTEx) 2020.
Ang tinuig nga labi'ng dako'ng ‘travel trade event’ sa gobyerno ipahigayon sa Setyembre 19 hangtod 28, 2020 sa lungsod sa Panglao.
Mga 50 ka sumasalmot ang mangabot alang sa PhiTEx nga gilangkoban sa mga sellers ug personahe gikan sa Tourism Promotions Board (TPB).
Apan ang ubang partisipante ilabi na ang mga langyaw, mosalmot sa mga aktibidad pinaagi sa online.
Sa gipahigayong virtual briefing niadtong Setyembre 16, Si Tourism Promotions Board (TPB) chief operating officer Maria Anthonette Velasco-Allones miingon nga gipili nila ang lalawigan sa Bohol nga mopakita sa ‘new normal’ sa mga tigbiyahean tungod kay ang mga opisyal sa industriya sa turismo nakakita mismo kun gi-unsa ni Gob. Arthur Yap ug mga lideres sa lalawigan ang malamposong pagdumala sa pandemya sa Panglao.
“Para mapakita natin sa mga gustong magbiyahe ano ba ang kinahaharap na challenges at excitement in the new normal,” matud pa ni Allones.
Kini tungod sa tinguha sa gobyerno sa paglusad sa “travel bubbles and corridors” – nga nagpasabot sa pagtugot sa mga piniling bisita gikan sa mga luwas nga dapit o nasod nga mangari ug paglihok pinaagi lamang sa ‘point-to-point pre-accredited establishments’.
Si Gob. Yap atol sa virtual briefing nitumbok sa panginahanglan sa paglihok og dungan ngadto sa unahan tungod kay ang Bohol nawad-an na og P10 bilyon ngadto sa P12 bilyon atol sa pandemya.
Kini subay usab sa paningkamot sa gobyerno sa pagbukas og balik sa turismo sa nasud sa panghinaot sa pagsalbar sa milyon nga trabaho nga nagsalig sa industriya sa turismo taliwala sa COVID-19 pandemik.
Si Yap mipa-ambit nga ang lalawigan nakahimo sa pagpabilin sa gamay lamang nga numero sa aktibong kaso sa COVID-19 sa lungsod sa Panglao tungod sa Oplan Kalasag ni Dagohoy – usa ka operasyon diin ang lalawigan gibahin ngato sa 16 ka security zones nga gi-monitor sa mga police officers, coastal spotters ug mga opisyal sa lokal nga kagamhanan.
Ang probinsyal nga kagamhanan mi-isyu usab og 300,000 ka mga family-based contact tracing cards nga maoy e-scan matag establisemento.
Nakapatukod usab ang lalawigan og laboratoryo alang sa polymerase chain reaction (PCR) swab tests diin ang resulta makuha dayon sa mubong panahon sama sulod sa 24 oras.
Kalabot sa hosting sa lalawigan sa PhiTEx, ang medical cluster sa Bohol Inter Agency Task Force (B-IATF) nagmugna og mga ‘health and safety protocols’ nga gamiton sa kadugayon sa kalihokan.
Ang tanang delegadong nangabot sa Bohol alang sa maong kalihokan, gipaubos sa 5 ka adlaw nga kuwarantena sa dili pa e-test alang sa COVID-19 infection pinaagi sa PCR test. (ecb/PIA7-Bohol)
Source: Philippines Information Agency (pia.gov.ph)
0 Comments