Cebuano News: Parehas kadaghana sa kagaw nakita sa swab sa may simtomas ug sa wala

TAGBILARAN CITY, Bohol, Sept. 28 (PIA) -- May simtomas man o wala, parehas ra kadaghan ang kagaw sa Corona virus sa ilong ug baba, ug parehas ra ang usab kapasipad sa pagpanakod niini, segun sa labing bag-o nga mga pagtuon kabahin niining sakit nga nanakod karon.

TABLA TA NGA TANAN. Mayor, taas nga opisyal, ordinaryo nga tawo parehas lang nga matakdan kon dili magpahimutang sa personal nga panalipod, ilabi na kay nasayran na nga bisag walay simtomas, mahimong makapanakod. (rahc/PIA-7/Bohol file photo)

Sa migawas sa pagtuon sa mga researchers sa South Korea, ilang napakita pinaagi sa pagtuon ang pagtandi sa kadaghanon sa kagaw sa SARS-CoV-2 sa 213 ka pasyente nga nasayrang nagpositibo sa kagaw.

Sa pagtuon, 54 porsyento sa mga pasyente nga walay simtomas nga gipakita, nagpositibo gihapon sa SARS-CoV-2, samtang laing 64 porsyento ang nagpakita sa mild nga mga simtomas may susama gihapon kadaghanan sa kagaw sa swab samples.

Sa duha  ka mga grupo, walay kalainan sa kadaghanon sa kagaw nga nakuha gikan sa mga ilong ug bubunlan sa mga gipangtestingan nga may simtomas ug sa mga walay simtomas.

Ang pagtuon gipatik sa online niadtong Sept. 22 sa journal nga Thorax.

Kini nga pagtuon gipangunahan ni Sung-Han Kim sa Asian Medical Center, Songpa-gu sa Seoul, South Korea.

"Kon  atong hunahunaon nga kadtong mga pasyente nga walay simtomas bisan pa kon may dala nga nga kagaw sa COVID-19, kini sila dili gyud mabantayan sa mga health care workers samtang kini sila magpadayon nga manimuyo kauban sa ilang mga pamilya ug mga higala sa komunidad. Kini sila maoy magpatakod ug makapasugod na sa pandemya sa usa  ka lugar, “ segun pa sa mga naghimo sa pagtuon.

Hangtud nga masayran kon unsa gayud ka grabe nga makatakud kadtong mga wala mipakita sa simtomas, ug hangtud kanus-a sila nga grabe nga makatakud, kini nagpaduso sa labing importante nga panginahanglan sa pagtesting ngadto sa mga natumbok nga mga grupo agi og pagpaneguro ug pagpanalipod nga dili makalanat ang pagpanakod, sugyot sa pagtuon.

Niini, gipakayab sa mga nagtuon ngadto sa publiko ang kamahinungdanon sa pagsul-ob og face mask bisan pa kon walay nagpakita og simtomas sa mga naa sa ilang palibot.

Gipalubad na usab  sa mga nagtuon ang sugyot nga palapdan na ang mga ipaagi sa pagtesting alang  sa COVID ug kini maga-apil na sa mga walay simtomas apan naa nanimuyo sa mga lugar nga may taas nga risgo, sama sa mga nursing homes, o sa mga ospital ug pasilidad alang sa nag-unang serbisyo panglawas. (rahc/PIA-7/Bohol)

Source: Philippines Information Agency (pia.gov.ph)