Cebuano News: PHITEX 2020, pormal nga gibuksan

TAGBILARAN CITY, Sept. 24 (PIA) -- Pormal nang gibuksan Miyerkoles sa buntag, Setyembre 23, ang Philippine Travel Exchange (PHITEX) sa Bellevue Resort sa lungsod sa Panglao.

Gipangunahan kini nilang Department of Tourism (DOT) Kalihim Bernadette Romulo-Puyat, Travel Promotions Board Chief Operations Officer Maria Anthonette Velasco-Allones, DOT Undersecretary for Tourism Development Benito Bengzon, Jr., DOT Assistant Secretary for Product and Market Development Verna Buensuceso ug ni Bohol Gob. Arthur Yap.

Ang pagbukas sa maong kalihokan gimarkahan sa talagsaong ‘vertical concert’ nga pasundayag sa Loboc Children’s Choir, Loboc Ambassador Band ug Kasing Sining Teatro Bol-anon Ensemble diin ang mga delegado nanan-aw gikan sa ilang nagkadaiyang  balkonahe o pinaagi sa livestreaming.

Sa iyang pagbukas nga mensahe, si Gov. Yap miingon nga bisan pa sa pandemya, ang PHITEX 2020 nagdala sa mga labing apektadong industriya nga nawad-an og minilyong trabaho ug binilyong kita, apan mitindog karon sa Bohol nga nisagubang sa mga kalainan sa pagbukas og balik sa ilang pultahan ug pagbangon sa atong kinabuhi gikan sa kahadlok ug kawalay kasigurohan.

“Despite the pandemic, PHITEx 2020 has brought together a severely impacted industry that has lost millions of jobs and billions in revenues, yet rises today here in Bohol, in defiance of the odds, to reopen its doors once more and reclaim our lives from fear and uncertainty, (Bisan pa sa pandemya, nahiusa sa PHITEx 2020 ang mga labing apektado nga industriya nga nawad-an sa minilyon nga trabaho ug biniyon nga kita, apan nangahas nga mibarug dinhi sa Bohol aron sa makausa pa, buksan na ang iyang mga pultahan ug luwason ang atong kiinabuhi gikan sa kahadlok ug klawalay kasegurohan), matud pa ni Yap.

Gipasalamatan sa gobernador si Puyat sa iyang pagtuo sa Bohol ug pagpadala sa Tourism Promotions Board ug sa pamilya sa DOT sa pakiglambigit sa kagamhanang probinsiyal.

Nagdala sa tema nga “Business Unusual,” ang PHITEX modagan taman sa Setyembre 24 diin ipakita sa mga nag-unang players sa industriya sa turismo ug ipaambit ang mga bag-ong estratehiya, teknolohiya ug marketing innovations nga mohulma sa sektor ning panahon sa pandemya ug post-COVID world. (ecb/PIA7-Bohol)

Source: Philippines Information Agency (pia.gov.ph)