DUMINGAG, Zamboanga del Sur, Sep 23 (PIA) – Gikalipay ug dako sa mga tribal leaders ang paghidangat ni Allen Capuyan, ang chairperson National Commission on Indigenous People (NCIP) ug National Task Force to End Local Communist Armed Conflict (RTF-ELCAC) executive director, sa mga Subanen Cultural Communities sa mga lungsod sa Dumingag, Mahayag, Midsalip, Tigbao ug dakbayan sa Pagadian ning Septyembre 21-23.
Si Capuyan, uban sa mga nasudnong buhatan sa kagamhanan nga mga sakop sa RTF-ELCAC nahidangat sa nasangpit nga mga lungsod isip kabahin sa interagency visitation nga gipasiugdahan sa NCIP ug RTF-ELCAC aron pakisayran ang mga nanag-unang isyu nga giatubang sa mga IPs.
Matud pa ni Timuay Eddie Rosing, presidente sa Peksalabuken Subanen Dumingag Association nga ang paghidangat sa mga mga kadagkoang opisyal sa nasudnong kagamhanan, usa ka talagsaon nga higayon diin sila ang linawas nga nakigkita sa mga lideres sa IP ug aron direkta nga ilang mabati ang mga problema sa mga Subanen.
Dako usab ang gibating kalipay sa 25 ka mga IP leaders sa lungsod sa Midsalip ang paghidangat sa mga buhatan sa nasudnong kagamhanan aron pagpamati sa mga gihambin nga mga sentimiento ug suliran sa mga IPs.
“Labihan ka dako ang among pagpasalamat nga ang pinakadako nga opisyal sa NCIP nga gikan sa kauluhan ang minaug ug gikuyog ang mga pangulo sa national government agencies aron paminawon ug hatagan ug kasulbaran ang among gihambin nga mga suliran. Ang paghatag niya ug abogado aron mo-depensa sa among kauban nga IP nga napriso nga gipasakaan ug kaso nga illegal mining, nakahatag namo ug paglaum nga mapadayon ang pagtahud sa katungod sa mga IPs dinhi sa among dapit,” matud pa ni Patricia Albaira, IP Leader sa Midsalip.
Gikalipay usab ni Albaira nga gitugutan sila nga makaparehistro ug makaduso sa ilang application sa ‘Minahang Bayan’ nga programa sa Mines and Geosciences Bureau (MBG) aron mamahimong legal ang ilang pagtikad sa kahinguhaan sa ilang dapit.
Tipik sa mga isyu nga gipadayag sa mga IP leaders mao ang mosunod: Paglapas sa prinsipyo sa Free Prior and Informed Consent (FPIC) sa mga proyekto nga gihimo sulod sa yutang kabilin, paghulma sa Ancestral Domain Sustainable Development Protection Plan(ADSPP), pagbaligya sa mga luna sa yuta sulod sa yutang kabilin, pagdili pagputol sa mga kahoy sulod sa ilang kaugalingon nga yuta, pagtukod sa farm-to-market road, sugang dagitab, water system, malahutayong programa sa panginabuhian, kakulangon sa IP teacher, ug daghan pa.
Naa nay 95 nga mga teritoryo sa IPs sa tibuok nasud ang naduaw sa hepe sa NCIP ug iyang gimando sa mga nasudnong buhatan sa kagamhanan nga pakisayran ang mga issues isip kabahin sa programa sa kagamhanan nga pagtapos sa terorismo sa nasud. (RVC/GCC-PIA/Zamboanga del Sur)
Source: Philippines Information Agency (pia.gov.ph)
0 Comments