Cebuano News: LAUM Bohol, gilusad pagtimaan sa sumad sa 7.2 magnitude nga linog

DUWA ARON MALINGAW. Usa sa mga kabahinan sa LAUM Bohol mao ang pag-tukod og mga kalingawan nga pang sports aron may kapahungawan sa kalaay ug wala magamit nga kusog sa mga kabatan-onan aron makab-ot ang maayong mental nga kabaskug. (rahc/PIA-7/Bohol)

TAGBILARAN CITY, Oct. 15 (PIA) -- Gilusad sa kagamhanang probinsyal sa Bohol ang programang LAUM Bohol, dungan sa pagtimaan sa anibersaryo sa 7.2 magnitude nga linog nga nitay-og sa lalawigan niadtong 2013.

Ang LAUM Bohol usa  ka programa alang sa tanang Bol-anon, ilabi na sa mga kabataan.

Usa kini ka multi-sectoral response sa kagamhanang probinsyal nga mogamit sa adbokasiya, edukasyon, pagtambag, paugnat sa kusog, pagbansay, pinansyal nga panginabuhian, kultura ug arte aron pagkab-ot, pagtabang ug pagkalipikar sa mga nanginahanglan ug tabang.

May lima ka components kini nga naglangkob sa: AMOMA (psychological, psychiatric intervention and crisis hotline); DUWA (sports); ABIBA (awareness and support group); DAYAG (arts, culture and history); ug BANSAY (skills training).

Atol sa paglusad sa programa nga gipahigayon sa Ceremonial Hall sa New Capitol ning syudad, si Gobernador Arthur Yap nagkanayon nga ang paglusad sa LAUM Bohol program gipahinungod sa kalig-on sa mga Bol-anon pinaagi sa paghatag og tabang ngadto sa mga huyang, wala’y nawong, wala’y tingog, ug ilabi nga ang mga kabataan sa Bohol, kinsa ning kalisod sa panahon dala sa pandemya, nag-antos sa kamingaw, depresyon, kapintasan, kakabos ug kawala’y kasigurohan.

Pinaagi sa paglusad sa maong programa, naglaum ang gobernador nga maghatag kini og inspirasyon sa tanan sa pag-apil niining kausa sa pagsalbar sa mga gibati’g pagkawala, naglibog ug wala’y paglaum ilabi na sa mga kabataan sa Bohol.

Gilagdaan ni Yap ang Executive Order No. 50 nga nagtukod sa LAUM Bohol Program dungan usab sa pagpanumpa sa pledge of commitment sa Sangguniang Kabataan Provincial Federation pinaagi sa presidente niining si Bokal Christian Victor Bolos III.

Atol sa programa, 6 ka cellphones ug simcards ang gitugyan ngadto sa 24/7 suicide hotline ug AMOMA Center.

Gisugdan ang ika-7 nga anibersaryo sa Great Bohol Earthquake pinaagi sa unity ride sa mga siklista sa kapitolyo mga alas 5:30 ngadto sa alas 8:00 sa buntag, Oktubre 15, 2020.

Gisundan kini sa usa  ka misa nga gipahigayon sa rooftop sa kapitolyo sa alas 7:00 ngadto sa alas 7:45 ug gisundan usab sa video presentation ug 20 segundos nga pagsirena sa wala pa gisugdan ang programa sa paglusad. (ecb/PIA7-Bohol)

Source: Philippines Information Agency (pia.gov.ph)