Cebuano News: Tagbilaran City, Most Business Friendly City sa 2020

TAGBILARAN CITY, Oct. 12 (PIA) -- Nakadawat na usab og laing award ang kagamhanang lokal sa syudad sa Tagbilaran. 

Kini human napili sa Philippine Chamber of Commerce and Industry (PCCI) ang syudad sa Tagbilaran isip Most Business Friendly City sa 2020 ubos sa Category 3.

Gikan sa 8 ka finalist sa tibuok Pilipinas, ang syudad sa Tagbilaran ang gi-proklamar nga mananaog tungod sa aktibo ug paspas nga pagtubag niini sa coronavirus disease (COVID-19) pandemic.

ANG NAGHUPOT SA TIMON si Mayor John Geesnel Yap II, anak sa mga negosyante usab kinsa nasayud sa panginahanglanon aron mobuhi og puhunan ang usa ka mamumuhunan. Gilukop sa syudad og butang og mga panalipod ang tanang mahimong kalustan sa sayang nga puhunan nga mausik ra tungod sa dili tatatw ug tul-id nga sistema. Ang Tagbilaran karon maoy labing hawod nga sudlan sa negosyo sa 2020, segun pa sa PCCI. (PIA Bohol file photo)

Matud pa ni Tagbilaran City Mayor John Geesnell ‘Baba’ Yap II sa iyang Facebook post, ang pagpalig-on sa health protocols aron magdugang sa consumer confidence; ang rapid impact assessment nga gihimo ni Michael Cañares; ang response ug recovery plan nga gi-asistahan sa United States Agency for International Development (USAID) SURGE Project nga gipangunahan ni Linda Paredes; ang mga may kalabutang ordinansa nga gipasar sa 14th Sangguniang Panlungsod nga gipangunahan ni Vice Mayor Toto Veloso; ug ang empowered partnership tali sa business/pribadong sektor; ang mga paningkamot sa mga department heads ug kawani sa lokal nga kagamhanan sa syudad sa Tagbilaran ang nakatampo sa bag-ong award nga nadawat sa syudad.

Gipahinungdan usab sa mayor ang pagtinabangay nga pangingkamot ug ang kasuod sa business community pinaagi sa Bohol Chamber of Commerce and Industry (BCCI) nga nakapahimong posible nga napiling Most Business Friendly City sa 2020 ang syudad sa Tagbilaran.

Gipasalamatan ni Yap ang tanang kawani sa kagamhanang lokal sa syudad sa Tagbilaran, ang makagagahum nga Diyos ug ang mga Tagbilaranons sa ilang pagsalig ug pagsuporta.

Ang award gihatag sa PCCI atol sa ika-46 nga Philippine Business Virtual Conference niadtong Oktubre 7 ug 8 uban ni Department of Trade and Industry (DTI) Kalihim Ramon Lopez nga nagsilbi isip usa sa  mga presenters. (ecb/PIA7-Bohol)

Source: Philippines Information Agency (pia.gov.ph)