Cebuano News: EO alang sa price cap sa RT-PCR test, gilagdaan na ni Duterte

MANILA, Nov. 6 (PIA) -- Pormal nang gilagdaan ni Presidente Rodrigo Duterte ang Executive Order nga magtakda og price cap alang sa reverse transcription polymerase chain reaction (RT-PCR) testing ug test kits sa nasud.

ALANG SA MAS LAPAD NGA AKSES SA RT PCR. Gipabarug sa Bohol ang RT PCR laboratory aron mas daghan ang mga Bol-anon nga makapatesting sa COVID-19 aron usab kapugngan ang pagkatag sa sakit. (rahc/PIA7/Bohol)

Base sa EO Number 118 nga gilagdaan niadtong Nobyembre 4, gimanduan ang Department of Health (DOH) nga seguradohon ang ‘accessibility’ ug ‘affordability’ sa COVID-19 PCR testing.

Samtang gipatabang ang Department of Trade and Industry (DTI) sa DOH alang sa pagtakda og price range sa test kits nga gigamit sa mga ospital, laboratoryo ug uban pang health facilities.

Gimanduan usab ang DOH nga magpagawas og tukmang abiso nga magpahibalo sa mga health facilities nga may accreditation na alang sa pag-operate sa COVID-19 diagnostic laboratories kalabot sa itakdang price range.

Apil usab nga gitumbok sa EO kun tagpila ang price cap sa test kits.

Nakalatid sa EO nga mahimong bawian og lisensya ug akreditasyon ang dili mosunod sa price range.

Kahinumdoman nga una nang mireklamo ang pipila ka overseas Filipino workers (OFWs) tungod sa nikabat sa P20,000 nga bayad sa swab test human nihunong ang Philippine Red Cross tungod sa wala pagbayad sa utang sa PhilHealth. (ecb/PIA7-Bohol)

Source: Philippines Information Agency (pia.gov.ph)