ILIGAN CITY, Nobyembre 24 (PIA)—Ang Emergency Operations Center (EOC) sa Iligan City nag tambag sa publiko nga magbinantayon panahon sa Holiday Season tungod sa hulga sa Coronavirus Disease 2019 (COVID-19).
Sumala pa ni Dr. Belinda Lim, EOC health cluster manager atol sa Virtual Presser, nga kinahanglan nga ma-obserbahan ang mga ‘preventive measure’ alang sa seguridad sa mga Iliganon nga mo-apil sa mga aktibidad panahon sa Holidays.
Matud ni Dr. Lim nga ang Department of Health sayo nagpagawas ug mga giya alang sa holiday season sama sa pag-‘limit’ sa mga partisipante sa mga kalihokan o aktibidad.
"Kung mahimo, kadtong miyembro lang sa pamilya ang mo-apil sa pagselebrar panahon sa Pasko," dugang niya.
Iya usab gipahimangno-an ang mga Health Units nga himuon lamang nga mubo ang mga aktibidad ug kinahanglan magsunod sa mga health protocol sama sa pag-gamit ug facemask ug pagmentinar sa usa ka metro nga distansya.
Dugang pa niya nga maglikay gyod sa paghawid-hawid sa bisan unsa nga mga gamit ug siguraduhon nga ma-mentinar usab ang kalimpyo sa palibot sa panimalay ug kanunay mag hugas sa kamot.
Iya usab gi-rekomendar nga kung mahimo, kinahanglan 'open area' ang mga lugar kung asa ipahigayon ang selebrasyon tungod kay kung sarado ang usa ka lugar, mas dali ang pagkuyanap sa coronavirus.
Gi-abisohan usab ni Dr. Lim ang mga indibidwal nga daling mataptan sa sakit sama sa mga senior citizen o dunay mga kasamtangang balatian, nga limitahan ang pag-apil sa mga tapok-tapok o peligro nga panagtigum.
“Kung dunay mamatikdan nga balatian sulod sa panimalay nga may kalabotan sa sintomas sa COVID-19, tawag o ipahibalo ang Barangay Health Emergency Rescue Team (BHERT) aron matagaan sa libre nga RT-PCR testing ug aron ma-monitor usab ang maong balatian,” dugang pa sa tigdumala sa EOC. (ZDJ/PIA-ICIC)
Source: Philippines Information Agency (pia.gov.ph)
0 Comments