KALIBO, Aklan, Disyembre 29 (PIA) – Temporaryo nga indi anay magbaton it mga Locally Stranded Individuals (LSIs) ro an-om ka mga munisipyo sa probinsya it Aklan.
Pagkapuno it mga Municipal Ligtas Covid Centers ag Barangay Isolation Units ro gintao nga rason it mga nasambit nga mga munisipyo sa indi anay pagbaton it mga nagabalik nga mga Aklanon.
Ro banwang Kalibo, Numancia, Buruanga, Malay, Altavas ag Batan hay indi mag-isyu it notice of acceptance sa indi magnubo sa 15 diyas para sa mga LSIs.
Pinakauna nga nag-anunsyo it moratorium sa pagpauli it LSIs ro lokal nga panggobyerno it Buruanga ag Malay nga pareho nga nag-umpisa ku Disyembre 5 ag magatapos sa Enero 2, ag 4.
Ku Disyembre 15, 2020, ro banwa it Numancia hay nagpundo man sa pagpaabot it mga LSIs asta Enero 14 it sunod nga dag-on.
Sa sueod mat a it 20 diyas, ro LGU-Altavas hay ngsuspende man sa pagbaton it mga na stranded nga mga Aklanon nga halin sa iba nga lugar sa sueod it nasyon umpisa Disyembre 16, 2020 asta Enero 4, 2021.
Samtang ro kabisera nga banwa it Kalibo, tungod sa Executive Order No. 090 series of 2020, hay suspendido man ro pagbaton it mga LSIs, umpisa Disyembre 20, 2020 asta Enero 3, 2021.
Ro munisipyo it Altavas ag Batan hay temporaryo man nga ginbawal ro mga LSIs ku Disyembre 16, 2020 asta Enero 4 , 2021 ag Disyembre 21, 2020 asta Enero 10, 2021.
Rason man sa nasambit nga suspensyon nga mataw-an man ro mga frontliners ag health workers it oras nga makapahuway ag makarekober sa tayuyon nga operasyon kontra sa coronavirus disease 2019 (COVID-19).
Base sa report it Provincia Health Office iya, ku Disyembre 27, 2020 may kabilugan eon nga 422 ka mga kumpirmadong kaso it COVID-19 ro probinsya, kung siin, 55 ro active cases ag 354 recoveries. Nakalista mat-a it 13 nga pagkapatay hanungod sa COVID-19 ro probinsya. (JSC/SQP/PIA6 Aklan)
Source: Philippines Information Agency (pia.gov.ph)
0 Comments