Cebuano News: Dagohoy, Sevilla, Valencia, wala pay natala’ng COVID-19

CORTES, Bohol, Dec. 23 (PIA) -- Duha ka adlaw sa dili pa ang Pasko, nagpabilin nga limpyo ang lungsod sa Dagohoy, Sevilla ug Valencia isip mga lungsod sa Bohol nga hangtud karon, wala pay natala nga kaso sa coronavirus disease (COVID-19).

Buot ipasabut, human sa 281 ka adlaw diha nga nagsira ang Bohol sa iyang mga utlanan aron dili makatabok ang kagaw nga hilabihang nanakod na sa daghang dapit sa nasud, wala pay ni bisan usa niining mga nahinganlan nga lungsod ang nasakit sa COVID-19.

Kini bisan pa sa kapid-an na  ka mga Bol-anon nga nangatanggong sa laing dapit, mga namauli nga Overseas Filipino Workers, ug nga mingtuyo og sulod sa Bohol sa opisyal nga mga katuyu-an.

BATASANA LANG GYUD ANG LUWAS NGA PAGGAWAS. Kompleto sa face mask, face shield, nanunay manghunaw, mag-aping sa mga butang nga kuptan, likayan ang paghikap sa nawong ug dili moduol sa daghang mga tawo aron masubay ang social distancing, kini maoy kasagarang gipaambit nga mga sekreto sa mga nakalingkawas sa sakit. (rahc/PIA-7/Bohol)

Sa Sistema sa pagdawat sa mga nangatanggong o locally stranded individuals (LSI), namauli nga Overseas Filipino Workers (OFWS) ug Authorized Persons Outside Residence, ang tanang lungsod sa Bohol obligado nga modawat sa ilang mga OFW, LSI ug APOR nga mosulod sa ilang lugar.

Hinuon, seguro nag-amping lang gyud ang mga manguli-ay sa tulo ka nahisgutang lungsod nga dili matakdan aron usab dili makadala sa sakit ngadto na sa ilang lungsod.

Sa laing bahin, kon unsa  man ang Sistema nga gipasunod sa mga taga lungsod nga wala sila ma-angin sa mga local nga pagpanakod, kana usab angay nga mahibaw-an.

Hinuon, mahimo usab nga nag-amping lang gayud ang mga taga Dagohoy nga silingan sa San Miguel nga may nagpadayon pa gihapon nga suliran sa local nga pagpanakod, hangtud pa karon.

Sama sa kaso sa Dagohoy, wala usab maapektohi ang Sevilla ug Valencia sa pagtakod sa kagaw pinaagi sa local transmission, ug mahimong nag-amping usab og maayo ang mga nag-atiman sa ilang mga nangabut nga kaigsoonan.

Kini usab samtang nagpadayon nga nagkaubos ang kaso sa coronavirus disease sa Bohol.

Sa labing bag-o nga ihap ug subay sa COVID Case Map nga gipaambit sa Bohol Inter Agency task Force, 22 na ka kaso sa coronavirus disease and natala sa Bohol, Disyembre 22.

Samtang sa kinatibuk-ang mga kaso, tulo na lang usab niini ang dala sa local nga pagtakod.

Mikabat na sa 761 usab ang kadaghanon sa mga Bol-anon nga nanguli ug nanulod dinhi sa Bohol ang una nga nasayran nga may pagtakod sa COVID apan na-uli-an na sa sakit.

Hinuon, bisan pa sa  panawagan sa  pag-amping, miabut na sa 16 ka kinabuhi sa mga Bol-anon ang nakalas sa sakit nga nakapalup-og na sa daghanang nga ekonomiya libot sa kalibutan. (rahc/PIA-7/Bohol)

Source: Philippines Information Agency (pia.gov.ph)