Cebuano News: 18 nakalas sa COVID-19 sa pagtak-op sa 2020

DYUTAY LANG APAN MAKALISANG. Bisan pa kon 18 ra ang namatay dinhi tungod sa COVID, dili kini makapahupay sa kabalaka sa mga turista nga buot mosulod ug mosuroy sa mga pangturismong dapit dinhi, pasabut ni Provincial Tourism Council chair Atty Lucas Nunag. (PIA Bohol)

TAGBILARAN CITY, Bohol, Jan. 4 (PIA) -- Gitapos sa mga Bol-anon ang 2020 sa  kasubo dihang namatay ang duha  ka mga pasyente nga giingon nga nabiktima sa coronavirus disease (COVID).

Kini human sa labing una nga kaso sa kamatayon nga natala sa usa  ka edaran nga lalaki nga nasakit sa COVID didto sa isla sa Pangangan niadtong Mayo 26, mga pito  na ka buwan ang milabay.  

Ang unang kaso sa kamatayon nga nakalas sa COVID, nahitabo usab duha  ka buwan human manarangka ang Bohol sa iyang mga ganghaan sa katuyuan nga pugngan ang mga tawo nga makasulod sa Bohol kay mahimo nga sila ang luwanan sa kagaw nga maka-ingon sa mga kaso dinhi.

Ang ika napulo ug pito ug ika napulo ug walo nga biktima sa COVID 19 nagagikan sa lungsod sa Tubigon ug lungsod sa Candijay, segun pa sa Bohol Inter-Agency Task Force on the Management of Emerging Infectious Diseases (BIATF-MEID), sa gipaambit nga COVID case Map, Disyembre 30, 2020.

Sa katapusang adlaw sa tuig, natala sa Bohol ang 19 na lamang ka kaso sa COVID, apan 18 usab ang ihap sa mga kinabuhi nga nakalas sa sakit.

Sa talaan sa mga nangamatay, usa na niini ang gikan sa Bien Unido, usa usab sa Corella, usa sa Danao, usa sa Garcia Hernandez, usa sa Panglao, usa sa Sagbayan, usa sa Talibon, usa sa Trinidad, usa sa Tubigon, duha sa Ubay, duha sa Buenavista ug laing duha sa Calape.

Sa Disyembre 30, mitala ang Bohol og walo ka bag-ong kaso sa COVID: upat ka kaso niini matumbok sa nanguli nga Locally Stranded Individuals sa San Miguel, usa pa ka Overseas Filipino Worker sa San Miguel gihapon, usa  ka OFW sa Antequera ug duha  ka kaso sa local transmission gikan sa Candijay ug Talibon.     

Ang nahibilin nga mga kaso, nadala pasulod sa Bohol sa mga  LSI, OFW ug nga Authorized Persons Outside Residence (APOR).

Kini naglakip sa duha  ka LSI sa Tagbilaran, duha usab ka LSI sa Bilar, usa  ka LSI sa Alicia, usa   ka LSI sa Tubigon, usa  ka LSI sa Carmen,  usa  ka LSI sa Ubay, ug usa  ka APOR sa Dauis.

Bisan pa man hinuon niini, kinatibuk-an nga 770 na ang mga Bol-anon nga nasakit sa COVID-19 nga nangaayo, bisan pa sa padayon pa usab nga pagpanghasi sa sakit nga mananakod. (rahc/PIA-7/Bohol)

Source: Philippines Information Agency (pia.gov.ph)