DAKBAYAN SA BUTUAN, Marso 1 -- Gilantaw nga mas modaku pa ang kita sa mga mag-uuma sa abaca alang sa ilang mga ani tunogd sa bag-ong mga makinaryas nga gipadangat sa local government unit sa Cabadbaran ug City Agriculture Office (CAO).
Pormal nang giturn-over ngadto sa upat ka mga asosasyon sa abaca farmers sa maong siyudad niadtong Pebrero 18, ang upat ka unit sa abaca stripping machines, aron mas mopaspas pa ang pagproseso sa ilang mga ani ngadto na sa lanot.
Sumala pa kang Mayor Judy Amante nga gipaningkamotan gyod sa panggamhanan nga mahatag sa mga mag-uuma ang mga panginahanglanon nga dako og tabang alang sa ilang panginabuhian sa mga mag-uuma sa abaca.
Dugang sa mayor nga panahon pa ni Gob. Dale B. Corvera, nga nahimong mayor sa Cabadbaran sulod sa tulo ka termino, ang paghatag og ayuda sa mga mag-uuma, ilabi na sa abaca nga maoy nanguna karon nga gitanum sa siyudad, ug iya lamang gipadayon sa kasamtangan.
Nagkantidad og P150 mil ang matag makinarya nga gipadangant sa Ansili Tribal Association, Inc., Lusong Manobo Mamanwa Farmers, Inc., Mamanwa Manobo Indigenous Peoples Org., ug Puting Bato Farmers Association, sumala pa kang Ma. Arcelle Soria, ang city agriculturist.
Dugang ni Soria nga giplanuhan na usab sa LGU ang pagtukod sa Consolidation Center alang sa mga abaca farmers didto sa Brgy Mahaba, nga gigahinan na og P1.5 milyon sa local nga panggamhanan.
Sa pinakaulahing datos nga natala sa CAO, mokabat na sa kapin kon kulang 500,000 hills sa abaca ang natanom gikan sa kapin kon kulang 190 ektaryas nga plantasyon sa abaca sa syudad.
Katambayayong ang Cabadbaran sa pagpatuman sa Plant! Plant! Plant! and Process! Process! Process! Projects sa AGUSAN UP!, ang kampanya sa pagpalambo sa administrasyon ni Gob. Corvera kaabag ang buhatan ni Kong. Angel Amante-Matba. (Angel Lyn F. Gaviola, Agusan Up, LGU Agusan del Norte/PIA Agusan del Norte)
Source: Philippines Information Agency (pia.gov.ph)
0 Comments