DAKBAYAN SA BUTUAN, Marso 1 -- Gihimo ang blessing ceremony bag-ohay pa lamang sa hapit P1 milyon nga Road Rehabilitation Project sa main entrance sa Agusan del Norte Provincial Police Office (PPO) sa Camp Rafael Rodriguez ning dakbayan.
Niini, mapasalamaton kaayo ang mga kadagkuan sa kapolisan sa rehiyon ug sa probinsya kang Gobernador Dale B. Corvera ug Kongresista Angel Amante-Matba tungod sa pundo nga gigahin sa probinsya alang sa maong proyekto.
“Thank you to our two great leaders Gov. Dale and Congw. Angel for the support and pagtubag to our request in funding this road,” sumala pa kang PBGen. Romeo M. Caramat.
Dugang ni PBGen. Caramat nga walay puas ang suporta sa duha ka lider sa Agusan del Norte ug dali nilang giaksyonan ang ilang hangyo nga ma-semento ang maong kalsada.
Mapasalamaton usab si PNP Provincial Director PCol. Martin Gamba sa probinsya tungod sa mga suporta niini panahon nga naay aktibidad nga ilang himoon.
Sa iyang mensahe, gipasabot ni Gob. Corvera ang maong proyekto nga kalsada bunga sa pagtampohay sa gobyerno ug pribadong sector.
“Dili sayon mangita og kwarta para sa usa ka proyekto,” sumala pa ni Gob. Corvera.
“Mao nga I’m very happy that this project is completed out of the convergence of support not only from government but also from the private sector,” dugang Gob. Corvera.
“Ang usa ka dakung problema mahimong gamay kung kita magkahiusa. That’s what we need in governance,” panapos sa gobernador. (Karen Kei Decamotan, Agusan Up, LGU Agusan del Norte/PIA Agusan del Norte)
Source: Philippines Information Agency (pia.gov.ph)
0 Comments