TAGBILARAN CITY, Feb. 4 (PIA) -- Gipahayag sa Department of Environment and Natural Resources (DENR) nga ang mga plastic straws alang sa mga softdrink ug coffee stirrers posibleng idili na sa nasod sa di madugay.
Matud pa sa usa ka pahayag sa DENR, ang maong mga produkto nalakip na sa listahan sa non-environmentally acceptable products (NEAP) nga gitun-an sa National Solid Waste Management Commission.
Ubos sa Ecological Solid Waste Management Act of 2000 o Republic Act 9003, bisan unsang items nga nalakip sa listahan sa NEAP, idili na base sa gitakda sa Commission.
Gikonsiderar kini nga usa ka ‘milestone’ ni DENR Undersecretary Benny Antiporda tungod kay matud pa, human sa kapin duha ka dekada sa pagpalabang sa Ecological Solid Waste Management Act of 2000 o RA 9003, karon lamang nakapagawas ang komisyon og listahan sa mga non-environmentally acceptable products.
Matud pa sa DENR, ang resolusyon gipasa taliwala sa mga oposisyon gikan sa pipila ka miyembro sa komisyon sama sa Department of Trade and Industry (DTI), ug ang mga sektor sa manufacturing ug recycling industries.
Giangkon ni Antiporda nga daghan pang angay gukdon ang ilang ahensya aron masolusyonan ang solid waste management sa nasod.
Natunong ang desisyon nga padayon nang idili ang paggamit sa plastic straw dungan sa pagsaulog sa International Straw Free Day niadtong Miyerkoles, Pebrero 3. (ecb/PIA7-Bohol)
Source: Philippines Information Agency (pia.gov.ph)
0 Comments