MISAMIS ORIENTAL, Pebrero 2 - Sukad sa pagsugod sa pandemya ang buhatan sa Misamis Oriental Provincial Jail (MOPJ) naprotektahan ug walay natala nga kaso sa Corona Virus Disease (Covid-19).
Apan kagahapong adlawa, Miyerkules, Enero 27, 2021 gikumpirma ni Assistant Jail Warden Maricris Mulat nga usa ang kumpirmadong nagpositibo sa Covid-19.
Ang nataptan sa virus nga person deprived of liberty (PDL) usa ka 57 anyos nga nagpositibo ang resulta niadtong adlawng Domingo, Enero 24, 2021.
Nakasinati kini sa iyang sintomas adlawng Biyernes ug gidala dayon kini sa ospital aron masuta ang iyang kahimtang og ma-swab test ug positibo ang resulta.
Gipasabot ni Mulat nga dili angay kabalak-an nga nakatakod kini sa ubang inmates kay aduna kini siyay kaugalingong lawak.
Aduna hinoun 13 ka inmates nga gikonsiderang high risk gumikan sila ang close contact niini kay lakip sa nagtabang sa biktima nga madala kini sa balay tambalanan.
Ang 13 ka priso gi-isolate na karon panahona ug gipaubos na sa swab test.
Gikunsulta na ni Warden Mulat si Provincial IATF Chief Dr. Jerie Calingasan aron hingpit nga mapahugtan ang mga standard protocols nga ipatuman sulod sa prisuhan.
Usa niini ang pagpailawum sa tanan inmates ug MOPJ personnel sa swab test aron masuta kung asa gikan ang virus labina nga labihan man ka hugot ang pagpatuman sa mga health protocols sulod sa prisuhan.
Mando sab ni Dr. Calingasan nga kinahanglan magsulti kung adunay gibati sama sa ubo ug hilanat aron matambalan gilayon.
Gidili sab ang pagdula sa basketball nga maoy ilang kalingawan sa ilang basketball court alang sa pagpugong sa pagkaylap sa makapatayng virus.
Gipahibalo na ni Asst. Warden Mulat ang korte nga ikansela ug ireskedyul ang mga naka-skedyul nga mga hearing sa inmates karung semana tungod sa ilang sitwasyon karun.
Dugang ni Mulat nga gikoordinar usab nila ang mga mayor sa matag selda sa pagmonitor sa ilang mga kauban kung adunay nagpakita sa flu-like symptoms.
"So far wala paman. Everyday mi gameeting sa mga mayor ug nanungkulan sulod diri sa jail nga mga piniriso kay sila man ang direct contact ug sige mi update sa ilaha kung aduna bay naghilanat. Wala paman sad," sulti ni Mulat.
Gipaabot sab niya ang iyang hugot nga pasalamat ngadto kang Governor Bambi Emano ug Dr. Calingasan nga wala sila pasagdi hilabina ang mga inmates sa MOPJ.
"Si Gov. Bambi ug si Dr. Calingasan wala gyud mag undang og hatag sa support sa amua," dugang sulti niini.
Dili angayan ikabalaka kay hugot karon nga gipatuman ang saktong gabayan aron mahilayo sa virus ang mga inmates kay kamanduan ni Gov. Bambi ug Provincial IATF Chief Calingasan nga mas pahugtan pa ang mga lakang aron malikayan ang pagkaylap sa virus ug sila maprotektahan, labaw sa tanan gamay nalang ang panahon aduna nay umalabot nga bakuna. (MisOr PIO)
Source: Philippines Information Agency (pia.gov.ph)
0 Comments