Cebuano News: BPMC Chief unang gibakunahan sa Sinovac batok COVID-19

MALAYBALAY CITY, Marso 10 (PIA)—Si Dr. Miguel Antonio C. Prantilla, ang Chief of Hospital sa Bukidnon Provincial Medical Center (BPMC), maoy pinaka-una nga gitupokan sa bakuna batok COVID-19 niadtong Lunes, Marso 8.

Kini pagasundan dayon sa pagpangbakuna sa kapin 530 ka mga frontliners sa BPMC sumala sa mga nakalista ug naka-schedule nga bakunahan sulod sa tulo (3) ka adlaw—sugod sa petsa 8 hangtud Marso 10.

Gipasabot ni Dr. Prantilla nga ang tanang magpabakuna mo-agi gyud sa hustong proseso sama sa registration, counseling, screening, vaccination, ug post-vaccination monitoring.

“Kining post-vaccination monitoring, dinhi obserbahan ang indibidwal sulod sa 30 minutos hangtud usa ka oras kung duna bay reaksyon sa lawas,” dugang ni Prantilla.

Sumala sa gihatag nga orientation niadtong Lunes, dili bakunahan ang mga mabdos ug nagplanong magburos. Dili pud pwedeng bakunahan ang ubos sa 18 anyos ug sobra sa 59 anyos ang edad, apil kadtong mga dunay allergy sa bakuna. 

Pagka-ugma, human sa pagpangbakuna, atol sa gipahigayong 1st quarter meeting sa Provincial Disaster Risk Reduction and Management Council (PDRRMC), si Provincial Health Officer Dr. Gary Guido Tabios mi-report nga dunay 202 kon 92 porsyento sa mga health workers sa BPMC ang nabakunahan base sa naka-schedule ug na-register para sa unang adlaw. 

Matud pa ni Tabios nga tulo ka adlaw ang gikinahanglan aron mabakunahan ang tanang 530 ka mga front liners. Sa unang adlaw 218 ang target nga tupokan pero wala kini matuman.

“Mikabat lang sa 202 ang natupokan sa ‘first day” tungod kay ang 13 nagpa re-schedule ug tulo (3) ang wala nagpabakuna,” dugang ni Tabios.

Gibutyag usab niya nga sa 202 ka mga nabakunahan sa unang adlaw, usa lang ka frontline ang nakasinati sa gitawag nga AEAIE kon Adverse Events After Immunization Experience diin nagpakita kini ug mga ‘rashes’ kon katol-katol sa lawas apan nawala ra kini human gipa-inom og ‘Anti-histamine’.

Dugang pa ni Tabios nga karong umaabot Hulyo, gila-umang mo-abot na ang gi-order sa Provincial Government of Bukidnon nga mokabat sa 390,000 doses sa ‘Novavax Vaccine’ diin target niini nga mabakunahan ang kapin 180,000 ka mga frontliners nga naa sa 'priority list'. (BGE/PIA Bukidnon)

 

Source: Philippines Information Agency (pia.gov.ph)