Cebuano News: DAR mi-‘turnover’ sa 1,847 nga CLOA ngadto sa mga mag-uuma sa Bukidnon

MALAYBALAY CITY, Marso 10 (PIA)--Personal nga gitunol ni Department of Agrarian Reform Secretary John Castriciones ang 1,847 nga titulo kon Certificate of Land Ownership Award (CLOA) ngadto sa mga mag-uuma sa probinsya sa Bukidnon adlaw'ng Sabado Marso 6.

Kapin sa 1,331 ka hektaryang yuta ang nadawat sa 1,527 nga Agrarian Reform Beneficiaries kon (ARBs) dinhi sa Bukidnon. Gidasig ni Castriciones ang mga nakadawat sa titulo nga mag tanom aron nga mo-uswag ang panginabuhi sa mga mag-uuma. 

"Sa panahon ngayon, marami ang naghihirap, marami ang nagugutom dulot ng pandemya. Ngunit sa pamamagitan nitong lupa na aming ipagkakaloob sa inyo, makakatulong ito sa inyong pamumuhay. Maari ninyo itong pagtaniman ng mga gulay upang makaraos sa kahirapan," matud pa sa kalihim.

Sa mensahe ni Vice Governor Rogelio Quiño, dako iyang pasalamat sa national government pinaagi sa DAR sa gihimong programa nga naghatag higayon sa mga mag-uuma nga maka-angkon sa titulo alang sa dugay na nilang gitikad ug gi-atiman nga luna. 

"I am blissfully thanking the national government thru the Department of Agrarian Reform for personally delivering these Certificates of Land Ownership to our dear Bukidnon farmers. Salamat kaayo Secretary John Castriciones ug kang President Duterte. This DAR program is really a big help to our farmers here in Bukidnon. In behalf sa atong pinalanggang Gov. Zubiri, dako kaayo atong pasalamat sa DAR. Tungod ining inyong programa naka-angkon na gyud ang atong mga mag-uuma sa CLOA sa ilang gitikad nga yuta,"dugang pa ni Vice Gov. Quiño.

Gihangyo usab ni Quiño ang mga nakadawat sa titulo nga dili ipang baligya ang yuta nga ilang nadawat aron naa pay ikabilin sa sunod nila nga henerasyon. 

Sa iyang kabahin, si Joyce Geron, taga barangay Dalwangan nga usa sa mga benepisyaryo, miingon nga dako kaayo ang iyang pasalamat sa gobyerno pinaagi sa DAR.

"Sa kadugay na nako nagpuyo dinhi, wala gyud ko sukad makagunit ug sama niini nga papeles nga gitawag ug Certificate of Land Ownership. Busa karon nalipay kaayo ko ug ang akong mga kauban. Dako kaayo akong pasalamat sa gobyerno pinaagi sa DAR nga karon naka angkon na gyud kog matawag nako nga akong kaugalingon nga yuta," matud pa ni Geron. (BGEpan/PIA Bukidnon)

Source: Philippines Information Agency (pia.gov.ph)