SYUDAD SANG ROXAS, Capiz, Marso 31 (PIA) – Ginapanugyan ni Gobernador Esteban Evan Contreras sa mga Capiznon nga maglikaw sa dalagko nga mga selebrasyon kag pagtililipon karon nga Semana Santa bangud sa pamahog sang COVID-19.
“Kon indi malikawan, mas maayo nga ang pagtililipon ipahamtang sa malapad ukon maligwa nga lugar; kinahanglan nga buksan ang mga pwertahan kag bintana agud malikawan ang transmisyon sang kagaw,” ang pahayag sang gobernador.
Samtang, liwat naman nga ginpahayag ni Contreras ang nagakaigo nga pagsuksok sang face mask, pag-obserba sang social distancing kag masami nga paghugas sang mga kamot agud maproteksyonan ang kaugalingon kag pamilya nga matapikan sang COVID-19 nga balatian.
Ang probinsya ang nagapabilin nga sa estado sang Modified General Community Quarantine humalin pa sang Hunyo 1, 2020.
Nahibaluan base sa rekord sang Provincial Health Office nga ang probinsya ang may kabilugan na nga 1,328 nga kaso sang nagpositibo sa COVID-19 nga ginalakipan sang 16 ka mga aktibo nga kaso, 1,248 nga mga naka-rekober sa balatian kag 64 nga nagkalamatay base sa Marso 29 nga rekord. (JBG/AAL/PIA Capiz)
Source: Philippines Information Agency (pia.gov.ph)
0 Comments