SAN JOSE, Antique, Marso 19 (PIA) -- Ginpalawig pa kang Commission on Elections (COMELEC) ang oras kang andang talatapan para sa luyag nga magparehistro bilang kabahin kang paghanda para sa nasyonal kag lokal nga eleksyon sa May 9, 2022.
Suno sa pahayag ni Atty. Ian Lee Ananoria, Provincial Election Supervisor III kang COMELEC-Antique, bukas ang mga opisina kang COMELEC sa pagbaton kang mga application kang voter’s registration halin Martes tubtob Sabado, masugod 8:00 A.M. asta 5:00 P.M.
Ang dya nga skedyul ang ginpatigayon halin pa kang Pebrero 15, 2021.
Nagpamaan man ang COMELEC nga may ginahiwat dun nga satellite registration sa mga kabanwahanan pinaagi sa mga kabaranggayan bilang sangka lihok agud madugangan ang numero kang mga magparehistro.
Nagpahanumdom man sanda nga tubtub Septyembre 30, 2021 nalang ang katapusan nga adlaw kang application for voter’s registration kag kabahin kadya ang target kang ahensya nga makadangat sa 400,000 ang numero kang kabilogan nga botante kang Antique.
Suno sa COMELEC, nagdangat dun sa 346,967 ang mga nakaparehistro base sa nagligad nga eleksyon kang 2019.
Sa pihak nga bahin, ginahingyo man ang publiko sa pagsunod kang mga patakaran kang standard health measures batok sa COVID-19 ilabi na kun mag-adto sa talatapan kang COMELEC para magparehistro.
Kapin sa 70 ka mga katawhan lamang ang pwede nga mapasulod kang COMELEC sa andang opisina sa pagregister kada adlaw.
Ginsaysay man ni Ananoria nga natalana ang adlaw kang Lunes para sa disinfection kang mga opisina kang COMELEC agud ma-mentenar ang kalimpyo kang lugar kag mahagan-hagan ang pagrapta kang kagaw. (JSC/LML/PIA6 Antique)
Source: Philippines Information Agency (pia.gov.ph)
0 Comments