Cebuano News: 15 namatay sa COVID-19 sa Mayo lang sa Bohol, apan daghan gihapon'g di pabakuna

CORTES, Bohol, May 31 (PIA) -- Mitapos ang buwan  sa Mayo dinhi sa Bohol nga nagbilin og 15 ka patay nga lawas tungod sa gikaintapan nga coronavirus disease (COVID).

Kini human natala karong adlawa ang ika 55 ka biktima sa COVID-19, segun sa Bohol Inter Agency Task Force on the management of Emerging Infectious Diseases (BIATF) sa ilang inadlaw nga COVID Tracking, May 31.

Kini usab ang kasamtangan nga ihap usa   ka tuig ug usa ug tunga ka buwan human ang Bohol nagpatuman sa kwarantina, Marso 16, 2020.

DILI SA KA ISUG. Daghan ang nagpabakuna, dili tungod sa ilang kaisug, apan sa ilang kaikog nga sila mao pa hinuoy makaingon sa pagtakod sa uban nga mahimong ila nahinuon nga ikamatay, kini usab ang punto sa PIA Bohol. (PIA Bohol)

Sa una nga usa  ka tuig sa pagkwantina human gikataho nga nakasulod na sa Bohol ang sakit, 27 ang kinatibuk-ang ihap sa mga Bol-anon nga kinabuhi nga nabuhis tungod sa sakit nga hilabihan ka mananakod.

Sa tinamban nga ihap, sa unang tuig, aduna lamay duha  ka kinabuhi nga makalas sa COVID sa matag buwan,

Apan sa buwan sa Abril, niining tuiga, sa wala pa matumbok nga hinungdan, ming  kalit og abut sa 13 ka kinabuhi ang nakalas sa COVID, segun usab sa pagsumada sa mga inadlaw-adlaw nga taho sa BIATF.

Sa 13 ka namatay, kini 600 porsyento nga pagsaka sa kaso sa mga nangamatay, kon itandi sa binuwan nga average sa 2020.

Sa pagtuo nga mingtagam na og nakakuha na sa ilang leksyon ang mga Bol-anon nga dili gyud mahimong pasagdan ra ang sakit nga tinuod gyud nga makamatay, minglabaw ang buwan sa Mayo nga nagpakita nga ming-abut na sa 15 ka pay sa sakit.

Taliwala niining tanan, daghan pa nga mga Bol-anon ang nanalaw sa pagpabakuna: ang gituohan sa mga health experts nga pamaagi nga ang usa  ka tawo, dili na mahidangat sa pagkagrabe kon maigo man sa COVID.

Kasagran nga rason, segun sa sa mga nagpadagan sa programa sa pamakuna, tataw sa kakulang sa mga katawhan sa pagdawat sa siyentipokong rason, apan ngani sa pagsubay sa sayop ug gituis nga kasayuran kabahin sa tambal.

Gawas sa pagpabakuna, ang pagpadayon sa pagsul-ob sa face mask, face shield, paganghunaw permi ug   ang pagmintinar sa social ug physical distancing daku usab og ikatampo sa personal nga panalipod.

Kini usab nga taho nagbutyag nga adunay 552 ka mga atibo nga kaso COVID niiining nahisgutan nga adlaw, 13 niini mga health care ug frontline workers, 39 ka bag-ong mga kaso gikan sa 81 ka mga swab samples nga gipagawas, 4 ka kaso ang bitbit sa mga nanguli nga mga Bol-anon gikan sa gawas sa lalawigan ug us aka kaso nga dala sa Authorized Person Outside residence (APOR). (rahc/PIA-7/Bohol)

Source: Philippines Information Agency (pia.gov.ph)