ANDA, Bohol, May 31 (PIA) -- Samtang napahunong ang halos kadaghanan sa turismo nga maoy gisaligan niining lungsod nga gigasahan sa puti nga kabaybayonan ug dagat nga nindut kaligu-an, mihangyo ang Anda sa panabang sa mga ahensya sa kagamhanan sa pagpatuman sa mga balaod sa kalikopan aron mapatunhay ang pagpanalipod sa ilang mga kabaybayonan.
Didto sa pagtapos nga kalihukan sa Buwan sa Kadagatan (Month of the Ocean), si Anda Mayor Metodio Amper personal nga mihangyog tabang sa Department of Environment and Natural Resources pinaagi ni Provincial Environment and Natural Resources Officer Ariel Rica, ug sa mga tigpatuman sa balaod sa kadagatan.
Nagkatapok sa Anda ang mga ahensya nga sakop sa Bohol Coastal Law Enforcement Council, ang Carood Council, ang mga Non Government Organizations sama sa PROCESS Bohol, Bohol Integrated Development Foundation, BISU Candijay Research Center nga nag-abagay alang sa pagpanalipod sa kabaybayonan ug pili ug ang mga kagamhanan nga natahasan niining gimbuhaton, aron tak-opan ang Month of the Ocean ug buksan usab ang Environment Month.
Sa tibuok adlaw nga kalihukan, gihimo ang Coastal Clean Up sa mga natungdan nga ahensya ug kahugpungan lakip na ang mga peoples organizations ug resorts sa lungsod, ang scubasurero nga giapilan sa 21 ka mga divers gikan sa Philippine Coast guard, Philippine National Police, Philippine Army, NGOs ug sa mga dive resorts sa lungsod alang sa paglimpyo sa mga ilawom sa kadagatan didto atubangan sa Poblacion ug Suba.
Didto sa hamubo nga programa nga gitambongan sa mga ahensya nga didto sa kalihukan, gipadayag ni Mayor Amper and kamahinungdanon sa ilang mga kabaybayonan ug buhilaman ilawom sa dagat sa ilang pagpahiluna sa mas gipalig-on pa nga turismo human sa pandemya.
Didto usab gipalubad sa mayor ang kalisud nga gibati sa LGU sa pagpatuman sa public access law, sa pagpugong sa polusyon ilabi na sa mga resorts ug kabalayan daplin sa baybay, ug ang paglabay sa hugaw nga tubig (sewerage).
Inabangan sa Zoological Society of London (ZSL) ug sa European Union pinaagi sa German Cooperation (GIZ), ang mga proyekto sa Bohol sa pagpanalipod sa kadagatan ug kabaybayonan, gipalanat gikan sa pungkay sa mga kabukiran sa Bohol paingon nga ngadto sa piliw.
Dinhi sa Bohol, ang tinabangay sa mga langyaw nga tigpundo ug nga local nga Government Units ug kahugpungan, nagkahiusa sa pagpatuman sa Malungtaron nga pagpanalipod sa kabaybayonan pinaagi sa pagpatunhay sa biodiversity ug pagpanalipod niini, ilabi na dinhi sa mga ecosystems nga naas kabaybayonan sa Pilipinas nga gihulga ug apektado sa mga bagyo, o gimubo nga ProCOAST.
Matud ni PENRO Rica, kinahanglan lamang gayud nga ang pagprograma sa ingon niining kalihukan sa pagpatunhay sa kalikopan, himoong lukop kay ang basura nga gikan sa kabukiran, ibanlas man gayud gihapon sa kadagatan.
Sa hangyo ni Mayor Amper, gipalanog ni PENRO Rica ug sa mga ahensya sa kagamhanan ug NGOs ang suporta sa Anda, samtang gidason sa uban pang NGOS sama sa ZSL ang paggahum sa mga komunidad paingon sa siyentipikong pamaagi sa pagpahiuli ug dugang pagpa-usbaw sa sa kalikopan.
Didto usab sa programa, gisaysay sa mga NGOs ug GOs ang mga nakab-ot na nga mga milestones sa pagpanalipod sa kabaybayonan ug kahinguhaan sa kadagatan, dugang pa sa ilang tagsatagsa ka mga panaad diha sa publiko sa pagpadayon sa paningkamot nga ikapatunhay ang pagpanalipod sa kabaybayonan, ilabi na sa mga hulga nga dala sa mga bagyo niining panahon nga nagkausab.
Kini usab maoy labing una ug labing dako nga tuyo sa proyekto nga ProCOAST. (rahc/PIA-7/Bohol)
Source: Philippines Information Agency (pia.gov.ph)
0 Comments