CORTES, Bohol, May 2 (PIA) -- Hangtud sa katapusang adlaw sa Abril ug halos duha ka buwan human magsugod ang pagpangbakuna sa mga Bol-anon nga anaa sa priority masterlist A1 o mga Helath Care Workers ug mga naa sa medical ug security frontliners, mikabat na sa 36, 551 ang nakakuha sa bakuna.
Sa labing bag-o nga taho sa Bohol Inter Agency Task Force on the management of Emerging Infectious Diseases (BIATF), napakita nga sa duha ka matang sa bakuna nga nakaabut na dinhi sa Bohol, nga 85 porsyento sa kinatibuk-ang nabakunahan, ang nadapatan sa Sinovac, ang bakuna nga gikan sa China.
Segun sa nasampit nga taho, 31,279 ka Bol-anon ng health care workers ug medical ug security frontliners na ang nabakunahan sa Sinovac.
Sa laing bahin, 5,272 na ka Bol-anon usab ang nabakunahan sa AstraZeneca, kini maoy milangkob sa 15 porsyento nga nakakuha sa bakuna nga AstraZeneca, base sa taho.
Sukad sa pagsugod sa pagpangbakuna, ang Sinovac, nga maoy una nga bakuna nga nahidangat dinhi isip donasyon sa China, hangtud sa Abril 30, mikabat na sa 40,740 ka vials sa bakuna nga Insik ang miabut sa Bohol: ang usa ka vial, usa usab ka tupokan.
Niini, may gibanabana nga 8,000 pa ka tupokan sa Sinovac ang natipigan sa Bohol aron ikapadayon ang pagpangbakuna sa buwan sa Mayo.
Sa Astrazeneca, miabut na dinhi ang 5,140 ka vials sa bakuna nga gikan sa Europa.
Ang matag vial sa AstraZeneca, igo sa napulo ka tupokan, ug segun pa sa BIATF, dihay mga higayon nga ang usa ka vial, moabut sa 12 ka tawo ang mahimong makadawat sa bakuna.
Tungod niini, misobra na og 132 ka HCW ug frontliners ang nakadawat sa unang tupk sa AsttraZeneca.
Laktud nga pagkasulti, sa 5,140 ka bakuna nga AstraZeneca, 36,551 na ka tawo ang nakadawat sa nahisgutang bakuna dinhi sa Bohol.
Ang AstraZeneca may dako nga posibilidad nga ang bakuna, madaut tungod kay human maablihan ang us aka bakuna, dili na kini mahimong ibalik sa tipiganan kon dili mahurot og tupok ang sulod sa vials.
Hinuon, walay taho nga ingon niini ang gisukip sa kasayuran gikan sa BIATF.
Subay niini, awhag sa mga tinugyanan, "kon sa higayon nga inyo na nga panahon nga mabakunahan, ilabi na kon AstraZeneca ang gamiton, ayaw gyud og sipyata sa pag-anha tungod kay mahimong masayang na ang bakuna, niining panahon nga daghan pa ang nanginahanglan niini."
Sa laing bahin, wala pa maapil sa taho sa BIATF nga gipagawas niadtong Abril 30, ang kon pipila ni niining kadaghanon ang nakadawat na sa ikaduhang tupokan.
Ang bakuna nga Sinovac, nga kinahanglang kaduha itupok human sa usa ka buwan gikan sa unang pagbakuna, may mga gikataho na nga mingdawat sa ilang ikaduha nga tupokan. (rahc/PIA-7/Bohol)
Source: Philippines Information Agency (pia.gov.ph)
0 Comments