DAKBAYAN SA BUTUAN, Mayo 3 -- Gihimo niadtong, Abril 27, ang konsultasyon kalabot sa proyektong “Beyond Rice” nga gipasiugdahan sa probinsya sa Agusan del Norte isip core processing project sa lungsod sa RTR.
Ang “Beyond Rice” usa sa 15 Core Processing Projects nga inisyal nga na-identify isip kabahin sa kampanyang Process! Process! Process! ubos sa AGUSAN UP!, ang kampanya sa pagpalambo sa administrasyon ni Gob. Dale Corvera kaabag ang buhatan ni Kongw. Angel Amante-Matba.
Magtambayayong pagpahiluna sa proyekto ang probinsya pinaagi sa AGUSAN UP!, ang Munisipyo sa RTR ubos sa liderato ni Mayor Richard Daquipil, mga nasudnong ahensya, apil na ang buhatan sa Department of Trade and Industry nga mikometer pagpadangat og mga ekwipo sa pagproseso sa mga produkto, ug mga residente sa lugar nga magsilbing processors sa mga produkto nga mugnaon.
Gihisgutan sa maong tigum ang mahimong mga targets sa proyekto, apil na ang gipunting nga halin nga Php50 milyones matag tuig pag-abot sa 2027 ug ang kantidad nga moadto sa mga banay nga magsandig unya sa proyekto ingon man ang mga estratehiya nga kinahanglang himoon aron mapaneguro nga magmalamposon kini.
Gibanabana nga mga 200 ka tawo ang makatrabaho ug kapin kon kulang 100 ka banay ang magsandig sa proyekto kung fully operational na kini.
Ang giplanohang inisyal nga mga produkto nga iproseso mao ang bodbod, bibingka, biko, puto, bitso-bitso ug rice wine.
Gawas nga mopahiluna og mga human sa pagproseso, ipahimutang usab sa proyekto ang "Kakanin Stopover" sa daplin sa highway sa sentrong bahin sa RTR alang sa mga travelers ngadto og balik sa mga syudad sa Butuan, Cabadbaran ug Surigao.
Magsilbi usab nga marketing arm ang proyekto sa mga processors sa lungsod nga mohatud sa ilang mga produktong kakanin sa mga outlets sa Butuan, Cabadbaran ug mga lungsod sa Agusan del Norte ingon man ang pagkuha ug pagpadala sa mga orders gikan sa ubang dapit sa nasud. (Shena Mae Pabia, LGU-Agusan del Norte/PIA-Agusan del Norte)
Source: Philippines Information Agency (pia.gov.ph)
0 Comments