Cebuano News: DILG nipasidaan sa LGUs, publiko batok sa pekeng Pfizer vaccines

Taliwala sa nagpadayong national vaccination program, nipasidaan ang DILG sa mga LGUs ug publiko batok sa mga pekeng Pfizer COVID-19 vaccines nga gipagawas sa merkado base na usab sa alerto nga gipagawas sa WHO. (DILG/PIA7-Bohol)

TAGBILARAN CITY, May 4 (PIA)--Hugot ang screening process nga gipatuman sa Bureau of Customs (BOC) sa mga dokumento sa mga nangabot nga mga bakuna sa Ninoy Aquino International Airport (NAIA) aron walay makalusot nga mga pekeng Food and Drug Administration (FDA) certification permits.

Kini isip pagsunod sa advisory ni Department of Interior and Local Government (DILG) Kalihim Eduardo Año kalabot sa pag-amping sa pekeng Pfizer COVID-19 vaccines, ug uban pang brand tungod kay adunay posibilidad nga pahimoslan sa mga tikasang negosyante ang pagbaligya og mga pekeng bakuna samtang may pandemya sa nasod.

Kalabot niini, gitambagan ni Año ang mga local government unit (LGU), ug ang publiko nga mag-binantayon ug mag-amping sa pagpili sa tinuod ug luwas nga bakuna.

Kini usab human sa gipagawas nga health advisory sa World Health Organization (WHO) nga gitawag og “global medical product alert,” nga may kalabotan sa pekeng COVID-19 vaccines BNT162b2 gikan sa gawas sa nasod.

Tungod niini, gimanduan sa DILG ang Philippine National Police (PNP) nga kumpiskahon ang mga pekeng vaccines sa COVID-19.

Ang mga pekeng bakuna adunay lot number “783201” ug ang expiry date may nakasulat nga Agosto 24.

Una kining nadiskubre sa nasod sa Mexico nga gipaubos na karon sa laboratory analysis sa WHO. (ecb/PIA7-Bohol)

Source: Philippines Information Agency (pia.gov.ph)