CABANGLASAN, Bukidnon, Mayo 23 (PIA)—Dako kaayo ang kalipay sa mga Lumad gikan sa Umayamnon ug Higaonon nga tribo sa lungsod sa Cabanglasan, Bukidnon tungod kay natuman na sa gobyerno, pinaagi sa Task Force ELCAC ang dugay na nilang gipangandoy nga makabaton og kaugalingon nga balay ug makalikay sa kagubot nga gihimo sa mga rebeldeng komunista sa kabukiran.
Atol sa 'groundbreaking ceremony' nga gihimo sa barangay Poblacion, Cabanglasan niadtong Biyernes, gipahayag ni National Housing Authority (NHA) Regional District Manager Madeleine Gilda Abellera nga kining 20 milyon ka pesos nga proyekto sa ‘housing’ nga gitawag ug “NHA-Cabanglasan IP Village,” mokabat sa 80 ka yunit sa mga balay. Ang disenyo ini duha ka andana kon “two-storey single detached design” nga nagkantidad og 250,000 pesos matag yunit. Naglangkob kini sa kapin sa napulo ka ektarya nga naa nahimutang sa Poblacion.
“Kini gituyo sa gobyerno aron makahimo’g usa ka malinawon nga komunidad sa mga pamilyang Lumad nga karon nagpuyo sa mga hilit nga lugar o kining gitawag nga 'Geographicically Isolated and Disadvantaged Areas,” dugang ni Abellera.
Sa samang higayon, si Cabanglasan Mayor Renante Inocando miingon nga kung mahuman na kini nga proyekto sa pabalay, makatabang kaayo kini sa 100 kon usa ka gatos nga mga pamilya sa tribong Umayamnon ug Higaonon nga walay kaugalingo’ng mga balay gikan sa mga hilit nga lugar, apil na ang mga nagpuyo duol sa mga sapa ug dagkong suba.
“Nalipay kaayo kami dinhi sa lungsod sa Cabanglasan tungod kay natuman na gyud ang saad sa kagamhanan nga mahatagan sa insaktong puloy-anan ang atong mga Lumad. Daghan kaayong salamat sa NHA ug kang Secretary Andanar. Mao kini ang commitment sa gobyerno niadtong gilusad ang ‘Convergence Areas for Peace and Development o CAPDev’ sa dinhi sa lungsod kaniadtong Hunyo 28, 2019,” dugang pahayag sa mayor.
Sa iyang ‘recorded video message’, gipaambit ni Communications Secretary Martin Andanar kung gi-unsa sa kagamhanan ang paghatag importansya ang mga Lumad. Gi-asoy niya nga kini nga proyekto natuman tungod sa panaghi-usa ug kooperasyon sa mga katawhan, lokal ug nasyonal nga gobyerno, pinaagi sa CAPDev aron matubag ang mga problema nga maoy hinungdan sa insurhensya.
"Angay gyud nga dunay desente nga puloy-anan ang atong mga kaigsoonang Lumad kay sila ang mas naapektuhan sa kagubot nga gihimo sa mga terorista’ng grupo. Sila ang unang mga biktima sa pagpanghasi. Ang uban naghalad pa sa ilang kinabuhi aron mapanalipdan ang ilang mga tribo ug pamilya. Bisan sa kanindot sa ilang kultura ug ka-abunda sa kinaiyahan diin sayon ra unta ang ilang kuhaan sa panginabuhi-an, ang pagpuyo nga malinawon nagpabilin pa gihapon nga usa ka hagit alang kanila,” dugang ni Andanar.
Gi-awhag usab ni Andanar ang iyang mga kaubanan sa gobyerno, mga development planners, ug mga tigpasi-ugda sa kalinaw nga magpadayon sa maayong binuhatan alang sa pagtabang sa katawhan.
Si Indigenous Peoples Mandatory Representative kon IPMR Geneveve Perino, sa iyang pasalamat, miingon nga karon lang nahitabo nga gihatagan sa gobyerno ang mga Lumad sa usa ka ‘housing project.’
“Dako ang among pasalamat sa National Housing Authority sa proyekto alang sa among tribo. Katingad-an gyud nga ang mga proyekto nangabot dinhi sa Cabanglasan Bukidnon. Dili matukib ang among kalipay ug dili namo malitok ang kinasingkasing nga mga pulong sa pagpasalamat,” matud ni IPMR Perino. (BGEpan/PIA Bukidnon)
Source: Philippines Information Agency (pia.gov.ph)
0 Comments