Cebuano News: Unom ka lungsod sa Bohol, wala'y aktibong kaso sa COVID-19, Mayo 5

TAGBILARAN CITY, Bohol, May 6 (PIA) -- Taliwala sa nagpadayon'g pagpakigbugno sa Bohol ug sa iyang mga medical front liners ug mga pasyente nga natakdan sa coronavirus disease (COVID-19), aniay maayong balita.

Samtang mikubos na og dyutay apan kahadlokan pa gihapon ang aktibong kaso sa COVID ngadto na sa 776, lima ka lungsod sa Bohol ang mitala na sa walay aktibong kaso sa COVID, Mayo 5, 2021.  

MAS ANGAY KAHADLOKAN. Tungod ka dili pugos ang pagpatesting sa mga Bol-anon, daghan ang nagtuo nga mas daghan pa sa mga katawhan ang aduna nay sakit nga COVOD apan wala mahibaw-i tungod kay wala silay timailhan ug wala usab sila moagi sa pagtesting. Misulbong og kalit ang kaso sa Bohol diha nga gihimo nga pugos ang testing sa Tagbilaran. (PIA Bohol) 

Sa taho sa Bohol Inter Agency Task Force sa ala una sa palis, walay natala nga aktibong kaso ang Buenavista, San Miguel, Danao, Alicia, Sagbayan ug Dimiao.

Gawas sa Dimiao nga limpyo ang kaso sa COVID, sa milabay nga usa  ka tuig, ang mga kalungsuran nga wala nay kaso sa COVID karon, mao usab ang mga kalungsuran nga nakasinati na og ilang sakop nga gibuhis ang kinabuhi sa sakit nga gikahadlokan tungod sa kahilabihan niini ka mananakod.

Ang Buenavista kanhi may duh aka kaso sa kamatayon sa COVID, samtang ang San Miguel, Danao, Alicia ug Sagbayan may tagsa  ka kaso sa nangamatay tungod sa COVID.

Sa susama nga adlaw usab, kanus-a gisaulog ang mga pista sa mga kalungsuran sa paghandum sa debosyon sa Santa Cruz, napakita nga nag-una pa gihapon ang Tagbilaran sa mga aktibong kaso 242, diin 235 niini ang mga residente, ug may walo sila ka Health Care Workers ang naangin sa sakit.

Napakita usab nga ang mga silingan nga kalungsuran sa Tagbilaran may mga tag-as nga kaso.

Ang Dauis nga tulo ka kilometro gikan sa Tagbilaran, may natala nga76 ka kaso, 73 niini mga residente ug 3 niini HCWs. (rahchiu/PIA-7/Bohol)

Ang Panglao, 15 kilometros gikan sa Tagbilaran, may 11 ka aktibong kaso, 10 ka residente ug 1 ka HCW.

Ang lungsod sa Maribojoc, 16 ka kilometros gikan sa Tagbilaran, may 51 ka kaso, pulos mga residente.

Ang Loon, 32 ka kilometros gikan sa Tagbilaran, may natala nga 37 ka kas0, 30 niini mga residente ug 7 nga HCWs.

Ang Baclayon, 6 ka kilometro gikan sa Tagbilaran, may natala nga 29 ka kaso, 25 ka residente ug 4 ka HCWs.

Ang Corella, 6 kilometros gikan sa Tagbilaran, may 10 ka kaso samtang ang Cortes, nga mga 10 kilometros gikan sa Tagbilaran, may 20 ka kaso.

Napulo ug siyam ka kaso sa COVID ang natala sa Balilihan, 24 ka kilometros gikan sa Tagbilaran.   (rahc/PIA-7/Bohol)

Source: Philippines Information Agency (pia.gov.ph)