Cebuano News: 'Usa ka tupokan sa bakuna, dili pa igo nga panalipud'

SUBAYA ANG VACCINATION RECORDS. Sa panahon sa unang tupokan sa bakuna, hatagan ka sa vaccination record, dinhi nakasulat kon kanus-a ang schedule sa sunod nga tupok, matud pa ni Macchiavelia Caliao, nurse, didto sa Kapihan sa PIA. (PIA Bohol)

CORTES, Bohol, May 5 (PIA) -- Dili igo ang proteksyon sa bakuna kon kausa lamang kini sa unta, duha ka tupokan.

Kinahanglang kompletohon ang ikaduha nga dose sa bakuna alang sa Coronavirus disease (COVID-19) alang sa labing kompleto nga proteksyon, kini matud pa ni Dr. Fruserma Mary Uy, Medical Specialist ug facility chief sa Covid Isolation Facility sa Bohol, sa milabay nga Kapihan sa PIA.

Kini usab ang gipalanog ni Macchiavelia Calliao, nurse ug kinsa maoy provincial coordinator sa National Vaccination Program dinhi sa Bohol.

Kini samtang nataho nga ang Bohol usa sa may labing ubos nga turn-out sa pagkuha sa ikaduha nga tupokan sa bakuna, nga kinahanglan kaduha itupok sa distansya nga labing menos upat ka semana alang sa Sinovac ug ug upat ngadto sa napulo ug duha ka semana alang sa AstraZeneca vaccine.

Alang sa bag-o lamang nasulod nga bakuna nga Sputnik nga gikan sa Russia, gikan sa unang tupok, mahimo na ang ikaduhang tupokan human sa tulo ka semana o 21 ka adlaw, ug gani, segun pa sa mga tighimo niini, mahimo nga mas padugayon pa ngadto sa ikatulo ka buwan ang paghatag sa ikaduhang tupok alang sa mas epektibo nga panalipod.

Dili kompleto ang katunga ra, dason sa duha ka mga health care workers nga maoy gisaligan sa pagpatuman sa kampanya ug pagtaho sa dagan sa pagpangbakuna dinhi.

Gawas tingali kon may uban nga bakuna na nga kausa lamang itupok o dawaton sa lawas, ang tulo nga ania na sa nasud, kinahanglan pa gihapon sa makaduha ka doses.

Gawas pa nga kinahanglang makompleto ang duha ka tupokan, giduso usab sa mga HCWs nga kinahanglan nga ang makuha nga ikaduhang tupok, parehas nga bakuna sa una nga makuha.

“Dili pareho ang mga gigamit nga mga teknolohiya sa mga nagkadaiyang bakuna, mao nga dili kini mahimo nga magsagol, kon una ka nga nakakuha sa Sinovac, angay lang usab nga Sinovac gihapon ang imong ikaduhang bakuna,” butyag pa ni Dr, Uy.

May mga bakuna nga migamit sa patay nga cells sa COVID, aduna usab mga bakuna nga migamit sa gikuhaag gahum nga mga virus nga kinaingnan sa sip-on.

Sa laing bahin, aduna usab mga bakuna nga migamit sa messenger RNA, ang labing abg-o nga teknolohiya nga gigamit isip pagpukaw sa panagang sa lawas aron makigbatok sa kagaw nga mosulod dinhi. (rahc/PIA-7/Bohol)

Source: Philippines Information Agency (pia.gov.ph)