TAGBILARAN CITY, April 29 (PIA) -- Nagpahinumdom ang Malakanyang sa tanang local government units (LGU) nga angay mahuman nila hangtod sa Abril 30, Huwebes, ang paghatag og ayuda ubos sa social amelioration program (SAP).
Gipahayag ni Presidential Spokesperson Harry Roque niadtong Martes, Abril 28 nga 3 ka adlaw na lang ang nahabilin aron mahatag ang SAP nga nakagahin sa labing kabos nga pamilyang naigo sa enhanced community quarantine tungod sa coronavirus disease 2019 (COVID-19).
Ubos sa SAP sa Department of Social Welfare and Development (DSWD), naa sa P5,000 hangtod P8,000 ang mahimong madawat sa kwalipikadong pamilya.
Pasidaan pa ni Roque nga tigpamaba usab sa Inter-Agency Task Force for the Management of Emerging Infectious Diseases, manubag gayud ang mga local chief executives nga mapakyas sa pag-apod apod sa SAP.
“Magkakaroon na po ng show cause order kung bakit hindi sila dapat panagutin administratively and criminally. They may be liable for dereliction of duty," matud pa ni Roque.
Gihatag ang SAP ubos sa Bayanihan to Heal as One Act, ang balaod nga gipalabang isip tubag sa COVID-19 pandemic.
Dinhi sa lalawigan sa Bohol, gipahibalo sa DSWD-7 nga ang lungsod sa Pilar ang labing unang lungsod ning lalawigan nga nahuman na sa pagpanghatag sa emergency cash subsidy nga SAP ngadto sa 3,119 ka benepisyaryong pamilya. (ecb/PIA7-Bohol) (ecb/PIA7-Bohol)
Source: Philippines Information Agency (pia.gov.ph)
0 Comments