Dungan sa pagbukas og balik sa mga buhatan sa LTO-7, nagpagawas usab ang buhatan og mga pamaagi sa pagproseso sa rehistro sa mga opisina nila nga gipaubos sa GCQ. (Hulagway sa LTO Region VII FB)
TAGBILARAN CITY, May 14 (PIA) -- Dungan sa pagbukas og balik sa mga buhatan sa Land Transportation Office (LTO) sa lalawigan sa Bohol sugod Miyerkoles, Mayo 13, nipagawas usab ang rehiyonal nga buhatan niini sa mga pamaagi sa pagproseso sa rehistro sa mga opisina nila nga gipaubos sa General Community Quarantine (GCQ).
Pinaagi sa ilang LTO Region VII Facebook Page, gipahibalo sa ahensiya nga kadtong mga rehistro nga nagtapos sa numero nga 3 sa ilang mga plaka, conduction sticker ug sa ilang initial registration nga makita sa ubos nga bahin sa ilang Certificate of Registration (CR), angay i-proseso gikan Mayo 13 hangtud 29 ning tuiga.
Alang sa rehisto nga nagtapos sa numero 4, angay kining i-proseso sugod Hunyo 1 hangtod 19.
Samtang kadtong mga rehistro nga nagtapos sa numero nga 5, angay i-proseso gikan Hunyo 22 taman Hulyo 10.
Gi-klaro usab sa LTO-7 nga tanan nilang buhatan dili una modawat og transaksiyon sama sa advance renewal sa rehistro ug advance renewal sa lisensya.
Sugod Miyerkoles, Mayo 13, gipabuksan na sa LTO Rehiyon 7 ang mga opisina niini sa Bohol nga mao ang Tagbilaran District Office, Talibon District Office, Licensing Extension Office sa Alturas Mall ug Driver’s License Renewal Office sa Island City Mall aron makahatag na og serbisyo sa mga Bol-anon.
Apan sa pagbukas og balik sa mga buhatan sa LTO, gipatuman ang hugot nga pag-implementar sa mga lagda sa seguridad sa mga kliyente ug kawani sa buhatan sama sa kanunay nga pagsul-ob og face mask, pag-obserbar sa social/physical distancing matag usa ka metro ang gilay-on gikan sa laing tawo ug kadtong may edad paubos 21 anyos, 60 anyos pataas ug mga buntis gidid-an una sa pagsulod sa ilang mga buhatan. (ecb/PIA7-Bohol)
Source: Philippines Information Agency (pia.gov.ph)
0 Comments