Cebuano News: Pagkontrola sa mga mayor sa lihuk sa mga tawo gipanghingusgan ni Gob. Corvera

DAKBAYAN SA BUTUAN, Mayo 5 -- “Dili gihapon ta mag kumpyansa. We are not yet in total freedom.”

Kini ang gipasabot ni Governor Dale B. Corvera sa mga Mayores sa usa ka syudad ug 10 ka lungsod sa Agusan del Norte kalabot sa angay bantayan karon nga gibalik na ang General Community Quarantine (GCQ) nga reglamento sa kampanya kontra COVID-19 sa probinsya atol sa gihimong 3rd virtual meeting niaadtong, Mayo 1.

Tungod niini gipanghingusgan sa gobernador nga magmugna gihapon ang matag mayor og mga preventive measures aron makontrola o ma-limitahan ang katawhan nga mogawas sa panimalay sa ilang tagsa-tagsa ka lugar aron magpabiling makalikay ang katawhan sa probinsya sa pagpanakud sa maong makalilisang nga sakit.

Dugang sa gobernador nga bisan kung ubos na sa GCQ ang Agusan del Norte mas daghan pa usab hinuon ang mga buluhaton sa panggamhanan. Gawas sa padayong pagkontrola sa lihuk sa mga tawo, ipahigayon niini ang mass testing. Apil sa mga ipaagi sa mass testing mao ang mga frontlines health workers ug mga indibidwal nga gikan sa mga lugar nga adunay kaso sa COVID-19.

Gitaho sa maong miting nga pipila ka adlaw lang ang milabay nagpahigayon og rapid testing ang probinsya ug ang syudad sa Butuan sa 188 ka indibidwal. Niini 33 ang nahimong positibo. Siyam niini residente sa Agusan del Norte: Cabadbaran City – 7, Tubay – 1, Nasipit – 1. Ang laing 24 lumulupyo sa Butuan.

Gawas sa rapid testing, moagi usab ang mga nagpositibo sa swab testing pinaagi sa Department of Health aron ma kumpirma kini.

Padayon ni Gob. Corvera nga segurohon sa mga mayor ang pagpahiluna og mga isolation and quarantine facilities sa ilang tagsa-tagsa ka lugar tungod kay sa maong pasilidades ipahimutang ang tanan nga nagpositibo sa rapid testing aron mas ma-monitor sila ug malikayan nga motakud sa ilang mga pamilya.

Atol usab sa maong virtual meeting, giklaro sa gobernador nga walay gahum ang mga Mayor nga mo-issue og Executive Order mahitungod sa GCQ tungod kay ang guidelines sa nasyonal lamang ang sundon aron mas han-ay ug uniporme ang mga reglamento. Apan, makahimo ang mga Mayor og mandu sa pagkontrola sa mga tawo nga mopalit og mga essential needs sama sa pagmugna og scheduling sa mamalitay per barangay ug pag-isyu og pass sa matag panimalay.

“LGU can devise a scheduling and can create a scheme for social distancing measures provided nga masunod ang health protocols. This is to regulate the access of essential needs para ma-control ang volume sa tawo ilabina diha sa merkado,” matud pa ni Gob. Corvera. (Karen V. Decamotan, Agusan Up, LGU Agusan del Norte/PIA Agusan del Norte)

Source: Philippines Information Agency (pia.gov.ph)