TAGBILARAN CITY, May 22 (PIA) -- Nagpagawas na ang Department of Labor and Employment (DOLE) og holiday pay rules alang sa Lunes, Mayo 25, 2020 nga usa ka Regular Holiday.
Gideklarar nga holiday ang maong petsa isip pag-obserbar sa Eid’l Fitr o Feast of Ramadan base sa Proclamation No. 944 nga gipagawas sa Malakanyang.
Sa guidelines nga gipagawas sa DOLE, ang mga empleyado nga dili mosulod sa trabaho sa maong adlaw makadawat pa gihapon sa 100 porsiyento sa iyang basic wage.
Alang usab sa mga mosulod sa trabaho, ang empleyado makadawat og 200% sa iyang sweldo alang sa unang walo ka oras.
Apan matud pa sa DOLE nga tungod sa gipatumang national emergency tungod sa coronavirus disease (COVID)-19 pandemic, ang mga employers gitugotan nga i-defer o malangan ang paghatag sa holiday pay hangtod moabot ang panahon nga mahimong mabalik na ang sitwasyon.
Samtang ang mga establisyimento nga sarado o nihunong sa operason karong may community quarantine, exempted sa pagbayad og holiday pay. (ecb/PIA7-Bohol)
Source: Philippines Information Agency (pia.gov.ph)
0 Comments