TAGBILARAN CITY, June 4 (PIA) -- Gipasakaan na og kaso sa Department of Justice (DOJ) ang naa sa gatosan ka mga opisyal sa barangay tungod sa anomaliya sa distribusyon sa social amelioration program (SAP).
Sa usa ka pahayag, gibutyag ni Department of Interior and Local Government (DILG) Kalihim Eduardo M. Año nga nikabat na sa 301 ka barangay officials ang napasakaan og kaso sa Philippine National Police-Criminal Investigation and Detection Group nga reklamong graft base sa direktiba sa DILG.
Tungod kini sa pagkalambigit sa maong mga opisyal sa barangay sa mga iregularidad sa pagpangapod-apod sa SAP sa mga benepisyaryo niini.
Gimanduan na sa DILG ang PNP nga gukdon ug siguradohong masilotan ang mga nagpahimos ug nangorakot nga mga opisyal, ug mga kawani sa mga local government units (LGU).
Kadaghanan sa napasakaan og kaso mga kapitan ug kagawad.
May gi-reklamo usab nga mga barangay secretaries, health workers, treasurers, SK chairman ug uban pa.
Giingong nagpahigayon na usab og case-build up ang DILG batok sa 76 pang mga lokal nga opisyal.
Reklamong paglapas sa Republic Act 3019 o Anti-Graft and Corrupt Practices, RA 11469 o Bayanihan to Heal as One Act, ug RA 11332 o Law on Reporting of Communicable Diseases ang gipasaka nga kaso batok sa mga opisyal.
Una niini, kahinumdoman nga nikabat na sa halos 3,000 ang nadawat nga reklamo sa DILG kalabot sa distribusyon sa SAP. (ecb/PIA7-Bohol)
Source: Philippines Information Agency (pia.gov.ph)
0 Comments