BAGAHE. Guyod sa mga LSI nga nahidangat sa Bohol gikan sa tulo ka buwan nga pagkatanggong sa Manila ang mga bagahe, daghan niini sayon ra nga alsahon. Ang mas bug-at nga bagahe, kon kanus-a masabtan sa uban nga kinahanglan gyud sila nga makauli aron mapalig-on sa presensya sa kabanay samtang nag-atubang sa hulga sa sakit ug pandemya. (PIA Bohol/PCG Bohol)
TAGBILARAN CITY, Bohol July 8 (PIA) -- Kinatibuk-an nga 119 ka locally stranded individuals (LSI) ug 12 ka Overseas Filipino Workers (OFWS) ang nahidangat dinhi sa Bohol Hulyo 8, 2020 luwan sa duha ka barko.
Sakay sa Multi-Role Rescue Vessel 44 (MRRV) sa Philippine Coast Guard (PCG) gikan sa Pier 15 sa Manila ug nahidangat dinhi sa pantalan sa Tagbilaran ang 25 ka mga LSI nga lakip sa Programa nga Hatid Tulong sa Buhatan ni Presidente Rodrigo Duterte ug gidumala sa Presidential Management Staff.
Ang Hatid Tulong proyekto sa presidente aron matabangan ang mga nangatanggong sa Manila nga makauli sa mga probinsya sakay sa bisan unsa nga kasakyan nga makabyahe.
Ang nahisakop sa kalihukan sa send-off sa Hatid Tulong gipasakay sa mga bus nga mohatud sa mga pasahero nga LSI ngadto sa mga lalawigan sa Luzon, Visayas ug Mindanao samtang may mga barko usab nga giluwanan paingon dinhi sa Visayas ug Mindanao.
Ang bahan lakip sa send-off nga kalihukan didto sa Quirino Grandstand niadtong Domingo, kanus-a pagka alas 5:00 sa hapon, migihan sa Pier 15 paingon sa Tagbilaran ug miabut Hulyo 7 sa alas 5;50 sa sayo nga kabuntagon.
Laing bahan sa mga LSI ang gikan usab sa Mandaue City sa Sugbo ang miluwan sa Lite Ferry I niadtong Hulyo 6 sa alas 11:30 sa gabii ug nahidangat sa pantalan sa Tagbilaran sa alas 5:30 sa sayong buntag.
Gikataho nga 72 ka LSI ug lain nga 12 ka OFWs ang sakay sa nahisgutan nga bapor ug deretso usab kining gikuha sa mga kalungsuran kon diin man manguli ang mga nahisgutan nga mga LSI ug OFW.
Sa Hulyo 8, gipaabut pag-abut na usab sa 41 ka LSI nga gikan sa Pier 15 sa Manila ug luwan sa Multi Mission Offshore Vessel 5501 (MMOV 5501) BRP Lapulapu.
Ang bahan migikan sa Pier 15 niadtong Hulyo 6, 2020 sa alas 5:00 sa sayong buntag ug gipaabut nga modunggo dinhi sa Tagbilaran Hulyo 8 sa sayo nga buntag, segun sa taho gikan ni Lieutenant Junior Grade Jener Tristan Erediano, ang hepe sa Coast Guard Station Western Bohol.
Samtang tataw nga nalipay ang mga nahidangat nga mga LSI kay nakauli na gayud, daghan usab ang mga Bol-anonnga mibati og kahingawa sanglit ang mga pagpasulod sa mga LSI ug mga OFWs mao usab ang kinasugdanan sa pagkabaton sa Bohol sa mga kaso sa COVID.
Niini, gibuksan man sa Bohol ang iyang mga pultahan alang sa mga nanguli nga LSI, kini human sila makapakita sa mga documentos ug mga resulta sa eksaminasyon nga wala silay sakit o timailhan sa sakit nga COVID, ug may pagtugot sa pagbyahe gikan sa Philippine National police.
Sa mga LSI nga ang resulta nga gikapresentar, resulta sa Rapid Antibody Diagnostic Test, gihukman sa mga tinugyanan sa Bohol nga silang tanan ipaagi sa pugos nga kwarantina sa 14 ka adlaw sa mga LGU supervised quarantine facility and isolation centers. (rahc/PIA-7/Bohol)
Source: Philippines Information Agency (pia.gov.ph)
0 Comments