Cebuano News: SK members sa matag lungsod sa Agusan Norte andam na alang sa unang paghukom sa Indigay sa Gulayan sa Kabatan-onan

DAKBAYAN SA BUTUAN, Hulyo 10 -- Nangandam na ang nagkadaiyang pederasyon sa Sangguniang Kabataan (SK) sa matag lungsod sa probinsya alang sa gikatakda nga unang paghukom sa Indigay sa Gulayan sa Kabatan-onan, nga himuon karong hinapos nga semana sa bulan sa Hulyo.

Subay sa gihimo nga site inspection sa Agusan UP Coordinating Unit pagpanguna sa Plant! Plant! Plant! team kagahapon, makita ang kasibot sa mga kabatan-onan nga nipartisipar sa maong contest pinaagi sa koordinadong pag-atiman sa tagsa ka production site, monitoring sa mga binhi nga gipatubo ug mainampingon nga pagpahimutang sa mga abuno nga gamiton alang sa mga gulay nga gitanom.

Sumala ni Ryan Martizano, SK Federation President sa lungsod sa Kitcharao nahimong dalan matod pa ang indigay alang sa iyang mga membro aron maghiusa panahon sa krisis, pagpaambit sa tagsa ka talento diha sa natad sa agrikultura sanglit pipila sa mga membro ang mikuha og kursong Agriculture, ingon man paghugoy-hugoy aron malikay sa daotan nga bisyo taliwala sa nagtunhay gihapon nga community quarantine sa probinsya.

Ang pagtan-aw sa kabatan-onan sa pag-uma nga usa ka highly viable profession maoy usa sa buot itisok sa Sangguniang Kabataan [SK] Provincial Federation sa mga kabatan-onan sa pag-aghat niini sa ilang mga sakop nga moapil sa Indigay sa Gulayan sa Kabatan-onan nga gipasiugdahan sa AGUSAN UP!, kaabag ang Provincial Agricultural Office [PAO] ug sa federation mismo.

Ang pamaagi sa paghukom sa maong gulayan mao ang mosunod:

a. Garden Site

b. Garden Design

c. Soil Management

d. Pest Management

e. Vegetable Stand

f. Productivity

g. Garden Records Management

Ang probinsiya ang nihatag sa nagkalain- laing klase nga mga liso sa mga gulay - Pechay, Eggplant, Okra, String beans, Ampalaya, Patola, Upo, Kalabasa, Kamatis - nga maoy itanum sa maong contest.

Tulo ka bulan ang durasyon sa maong contest. Ang unang paghukom mahitabo sa katapusan nga semana sa Hulyo, ika-duha sa Agosto ug final judging himoon sa unang semana sa Septyembre.

Ang makakuha sa unang ganti sa contest makadawat og Php30,000, ikaduha Php20,000 ug ang ikatulo, Php10,000. Ang ubang partisipante makadawat og consolation prize nga Php5,000 pesos matag usa.

Ang maong indigay kabahin sa Plant! Plant! Plant! Project sa AGUSAN UP!, ang kampanya sa kalambuan sa administrasyon ni Gob. Dale B. Corvera. (LGU Agusan del Norte/PIA Agusan del Norte)

Source: Philippines Information Agency (pia.gov.ph)