KALIBO, Aklan, Agosto 28 (PIA) – Nag-establisar it dugalingon nga Ligtas COVID Center (LCC) ro probinsya it Aklan ag 16 ka mga munisipyo bilang parte sa pagtinguha it kada lokal nga gobyerno nga kapin nga mapabaskog ro pagtapna sa pag-eapta it coronavirus disease 2019 (COVID-19).
Ro LCC hay isaea ka community-managed facility sa sueod it barangay, munisipyo, syudad, ukon probinsya nga tuyo ro pagpasimple ag pagpadasig sa pagkilaea, pagbaton, ag pag-manehar sa mga contacts, suspected, probable, ag confirmed nga mga kaso it COVID-19 nga may mahagan-hagan nga sintomas ag bukon eon gid it delikado sa panimaeay ag kumunidad.
Dugang pa, ro pagbutang it LCC hay bilang preparasyon man sa sigedas nga pag-inabo it kaso it COVID-19, kung siin makabulig ra nga indi maggutok ro mga ospital dahil kada LGU hay antigo eon magbuyot sa may mahagan-hagan nga kaso it Covid-19.
Suno sa report it Provincial Health Office iya, tanan nga gin-ubra ag ginkilaea nga Local Isolation and General Treatment Areas for COVID-19 cases centers it mga LGU hay ginsertipikahan ag nag-agi sa assessment ag capacity enhancement base sa Provincial Assessment Tool for Ligtas COVID Center.
Ro Aklan Training Center nga nakahamtang sa Barangay Old Buswang, Kalibo, Aklan hay gin-ubra nga Provincial Isolation for COVID-19 it probinsya.
May 56 ka mga kwarto ro natumod nga pasilidad base man sa anunsyo ni Aklan Governor Florencio T. Miraflores.
Naga serbe man nga Provincial Temporary Holding Area for Returning Overseas Filipinos (ROF) ro ATC kung siin ro profiling ag assessment it tanan nga mga ROFs hay ginahiwat rikara bago sanda ibutang sa anda nga sarili nga banwa.
Para sa municipal level, ro Kalibo Ati-Atihan County Inn ro narehistro nga LCC it capital nga banwa it Kalibo; samtang ro isolation facility it Malay hay sa S & E Hotel; ag ro ana it Ibajay hay sa Gradel’s Place
Ro Discover Boracay Hotel and Spa mat-a ro LCC it Banga, Lezo, Madalag ag Tangalan; para sa New Washington hay ro Ocean View Resort.
Samtang, ro mga banwa it Buruanga, Makato, Malinao, Nabas, ag Numancia hay sa mga masunod; Tatay Ugoy’s Resto Place, Makato Hospital, Malinao People’s Center, Margonz Hotel, ag Casa Loreta.
Para sa Batan , ro LCC hay sa Casa Del Mar; Libacao sa Ciajela Building and para sa Altavas mat-a hay nakahamtang sa Altavas Transport Terminal.
Ginausar nga housing facilitiy mat-a ro Ati-Atihan Festival Hostel sa Kalibo it mga frontliners eabi na gid it mga nars ag doctor nga nagatrabaho sa Dr. Rafael S. Tumbokon Memorial Hospital, nga gintaeana nga medical facility para sa mga biktima it coronavirus sa Aklan. (JSC/SQP/PIA6 Aklan)
Source: Philippines Information Agency (pia.gov.ph)
0 Comments