Cebuano News: Wala’y quarantine alang sa 3 ka adlaw nga byahe, Camiguin gob miingon

CAMIGUIN, Aug. 7 (PIA)—Sa pagtugot sa importante o emerhensiya nga pagbyahe sa mga residente, si Gob. Jurdin Jesus Romualdo miingon nga dili na kinahanglan mupailawom sa 14 ka adlaw nga quarantine kung nakapundo sila sulod lamang sa tulo ka adlaw sa destinasyon, ngalan nga wala sila’y sintomas sa coronavirus disease (COVID)-19.

Sa usa ka live video feed, Agosto 6, miingon si Romualdo nga kadtong mulapas sa gitugot nga adlaw sa ilang destinasyon kinahanglan nga mupailawon sa 14 ka adlaw nga quarantine sa isolation units sa probinsya. 

Pinaagi sa health card sa probinsya, masuta sa Barangay Health Emergency Response Teams (BHERTS) ang kasaysayan sa pagbyahe o posibleng exposure sa COVID-19 sa usa ka indibidwal.

"Ayaw pagkuha ug tiket kung wala ka pa'y acceptance sa lungsod, barangay o probinsya. Except kung Hatid Tulong ka,” giingon ni Romualdo sa paghisgot kabahin sa protocol sa pag-uli sa Camiguin.

Laing pang sugyot nga mga sukod

Miingon si Romualdo nga ang probinsya Rep. Xavier Jesus Romualdo naghangyo ug probisyon sa reverse transcription polymerase chain reaction (RT-PCR) testing isip usa ka tourist destination nga giila sa Department of Tourism (DOT). 

Gidugang sa gobernador nga temporaryong gamiton ang lugar alang sa dialysis sa ospital sa probinsya para sa  RT-PCR nga laboratoryo. Apan iyang giingon nga magpadayon pa gihapon ang pagtrabaho nila sa pasilidad sa dialysis.

Naghangyo usab ang probinsya sa mga medical technologists gikan sa Research Institute for Tropical Medicine (RITM) ug Food and Drugs Administration (FDA) nga mao’y magpahigayon ug pagbansay-bansay sa mga magdumala sa RT-PCR testing nga laboratoryo sa Camiguin. 

Gawas pa niini, sa pagdugang ug mga kapulisan sa probinsya, miingon si Romualdo nga mas sayon na ang pag-monitor sa pagsunod sa minimum public health standards ug mas mapalapad pa ang pagpakgang sa pagkuyanap sa COVID-19 sa probinsya.

Base sa datos, Agosto 5, ang probinsya aduna’y 1 ka kumpirmadong kaso sa COVID-19, 299 nga natalang persons with history of travel o posbileng exposure sa COVID-19. Diin 170 ang gikan sa Mambajao, 69 sa Mahinog, 9 sa Guinsiliban, 21 sa Sagay, ug 30 sa Catarman. 

Ang asymptomatic nga kumpirmadong kaso, usa locally stranded individual gikan sa Talisay, Cebu, kasamtangang gipahimutang sa municipal isolation unit. (RTP/PIA10)

Source: Philippines Information Agency (pia.gov.ph)