SYUDAD SANG ILOILO, Agosto 26 (PIA) - - Kabilugan nga 78 ka mga empleyado sa Nakatungdan Bisayas ang nakabaton na sang employees’ compensation kag nahatagan sang serbisyo may kaangtanan sa rehabilitasyon nagikan sa Employees’ Compensation Commission (ECC).
Ginpahayag ni ECC 6 Officer-In-Charge Stephen Barredo nabaton ining mga benepisyo sang mga tagbaton nga empleyado nga mga miyembro sang Social Security System kag Government Service Insurance System sa idalum sang Employees’ Compensation Program (ECP) sang ahensya humalin Enero tubtub Agosto 20, 2020.
Sa idalum sang ECP, anuman nga mga kasamaran kag balatian may kaangtanan sa trabaho nga nagresulta sa kasablagan kag kamatayon sang sakop nga empleado ang mabayaran.
Suno kay Barredo, ginpasanyog pa sang ECC ang implementasyon sang ECP sa pihak sang nagaluntad nga pandemya tuga sang coronavirus disease 2019.
Sa tion ang empleado makakuha sang COVID 19 bangud sang trabaho kag working environment, ini ang mabayaran pinaagi sa ECP ‘Increased Risk Theory’.
Ang mga frontline workers kasubong sang doctor kag iban pa nga health personnel, uniformed personnel, empleyado sa industriya sang pagkaon, empleado sa supermarket kag security guard nga may employee-employer relationship ang mahimo maka-file sang EC claim.
Ginpahayag ni Barredo nga ang mga kwalipikado nga recipient ang makabaton sang sickness kag medical benefits nga ginahatag sa idalum sang ECP. Kon ang empleyado ang napatay bangud sang COVID-19, ang pamilya mahimo maka-claim sang death kag funeral benefit.
Magluwas sa cash, medical kag death benefits, may mga rehabilitation services man para sa mga empleado nga may kasablagan pinaagi sa ECP.
Ang listahan sang rekisitos sa pag-file sang EC benefit claims ang makit-an sa ECC website sa www.ecc.gov.ph.
Ginsulit ni Barredo ang panawagan ni ECC Executive Director Stella Banawis sa mga sakop nga miyembro nga ipadayon ang pag-obserbar sa safety and health protocols batuk sa COVID 19 nga ginapatuman sang gobyerno kasubong sang pagsuksok sang face mask kag pagpabilin sang social distancing agud matapna ang paglapta sang kagaw.
Samtang agud labi pa makabulig sa pagbuhin sang risgo sa paglapta sang COVID 19 pinaagi sa pagpa-iway sang face to face transaction, suno kay Barredo, mahimo malab-ot ang ECC 6 pinaagi sa cellphone number 09295409542 ukon sa ECC Facebook account. (JSC/laf/PIA6 Iloilo)
Source: Philippines Information Agency (pia.gov.ph)
0 Comments