SAN JOSE, Antique, Agosto 6 (PIA) - May kabilogan nga P6.875 milyones o EUR125,000 ang gin-aprobahan nga pondo kang Misereor/KZE para sa Human Development Program (AHDP) ridya sa probinsya kang Antique.
Suno kay AHDP program Director Marilou Llavan ang dya nga proyekto para sa mga organisasyon kang katawhan (People’s organization/PO) para sa andang paghanas kag mataw-an sanda kang dugang ika-sarang sa pagpatuman kang tayuyon nga pagpanguma, siguridad sa pagkaon kag kabakod sa tion kang kalamidad.
Ang dya nga proyekto ipatuman sa tatlo ka tuig kang AHDP nga makabulig sa 400 ka nga pamilya sa anum ka mga barangay sa banwa kang Sibalom.
Dya kabahin kang padayon nga pagbulig kang AHDP sa organisasyon kang katawhan nga anda run man gina-asistiran sa sobra sangka dekada paagi sa pagorganisar kang andang mga komunidad.
Dya nagatuyo sa pagpasanyog kang sigurdad sa pagkaon, pagdugang kang kita kang mga pamilya, pagpatuman kang sarisari nga klase kang pagpananom kag pagpasanyog kang pagpamaligya kag produkto kang pito ka organisasyon nga nasakop kang proyekto.
Ginhambal ni Llavan nga sa pagpsanyog kang andang kapasidad ginalauman kang proyekto nga mas sampaton pagid sanda sa pagpatuman kang proyekto sa tayuyon nga pagpanguma agud masabat ang andang mga kinahanglanon.
Ang MISEREOR sangka German Catholic Bishops Organization for Development Cooperation kag kaimaw kang AHDP sa dya nga lihok.
Ang MISEREOR masobra run 50 ka tuig nga nagabulig para pakigbatuan ang kaimulon sa Africa, Asia kag Latin America.
Ang AHDP nagpakig-angot man sa sari sari nga ahensya kang gobyerno kag lokal nga pamunuan para sa dya nga proyekto. (JBG/PSM/PIA- Antique)
Source: Philippines Information Agency (pia.gov.ph)
0 Comments