Kinaray-a News: Antiqueños ginahingyo ang suporta para sa Census on Population

SAN JOSE, Antique, Agosto 6 (PIA) - - Ang Philippine Statistics Authority (PSA) nagahingyo sa mga Antiqueños sang suporta para sa Census on Population and Housing (CPH) nga hiwaton sa  Septyembre 1 tubtob 30, 2020 bisan pa padayon nga may pandemya sa COVID-19.

Si Provincial Statistics Officer Jesus F. Escote, Jr., sa programa nga PIA News Service  kang Philippine Information Agency, naghambal nga importante gid ang pagsabat kang husto sa mga pamangkot kang enumrators kag bulig kang mga lokal nga opisyales sa dya nga lihok kang gobyerno.

Ang CPH dapat ginhimu pa katong mayo kaday nga tuig pero tungod sa pandemya kang COVID-19 dya gin pasisul sa bulan kang Septyembre.

Ana ginpasiguro nga ang mga "enumberators" istrikto nga magasunod sa patakaran parehas kang paggamit kang mask, permi nga pagpanghugas kang alima kag pag distansya sa tawo samtang nagapamangkot.

Ang mga enumerators magasumite man kang "health certificate" nga sanda may mayad nga lawas kag pwede malibot  sa pag interbyu.

Ang 2020 Census on Population and Housing 2020 nagatuyo sa pagtipon kang impormasyon para nga ang gobyerno makahimo kang programa ukon laye paagi sa husto nga impormasyon tuhoy sa populasyon.

Sa Antique, ginhingyo ni Escote ang pagsabat kang husto sa mga pamangkot agud makatipon kang inpormasyon nga mangin basehan kang gobyerno sa paghimo kang nagakaigo nga programa para sa mga katawhan.

Ginpasiguro ni Escote nga ang mga impormasyon nga matipon paga kabigon "confidential" suno sa panugyan kang laye.

Ang enumerators maga paki-angot sa mga lokal nga opisyales  kag taw-an man sanda sa "Identification Cards" kag unipormi samtang naga census.

Masobra 130,000 ka mga balay ang ginapaabot nga masakop kang 2020 CPH based base man sa populasyon kang probinsya nga  582, 012  kang Mayo 2015 mid-decade census.

Ang paghiwat kang CPH katumanan sa Batas Pambansa Bilang 72, Executive order No.352 kag Republic Act No. 10625 nga nagadesignar sa PSA bilang ahensya nga mapatuman kang census.

Ginhambal ni Escote nga ang nahauna nga Census ginhiwat kang 1903 kag ang 2020 CPH ika-15 run nga Census of Population  kag ika -7 run nga Census of Housing sa Pilipinas. (JBG/PSM/PIA-Antique)
 
 
 

Source: Philippines Information Agency (pia.gov.ph)